aram

Tamîrkaro peyên ê makîneyanê fotografî yê Amedî

Bi averşîyayîşê teknolojî xeylî karî werte ra wedarîyayî. La hewna zî tayê meslekî estê ke hemverê nê de xover danê. Wareyê westa Ezîzî yê Amedijî nê meslekan ra yew o

Serra 1826 ra nata gama antişê fotografê ewilênî ran ata xeylî çîyî ameyî vurnayene. Dima dewrê fotografanê dîjîtalan dest pêkerd. Telefonê mobîlî zî nê ser o bîyî zêde. Merdimî eşkenê vajê ke hendî bi kalîteyêka berze fotografê cuye eşkeno bêro antene.

Averşîyayîşê teknolojî kerd ke xeylî meslekî raste ra wedarîyê. Înan ra yewe zî tamîrkarî ya. Wextêko derg o ke ‘eştiş’ kewto herinda tamîrkerdişî. Labelê hewna zî xeylî westayî estê ke karê înan tim dewam keno. Înan ra yew zî westa Ezîz o Amedij o. Azîz Kûrt hetê xeylî merdimanê ke bajar de karê fotografkarîye kenê ra yeno naskerdene. Serra 1995 ra nata karê tamîrkerdişê makîneyanê fotografan keno. Gama ke pîya bi zamayê xo westa Mehmetî dest bi nê karî kerdo 14 serre bîyo. Ezîz vano: “Mi nê dikanî de verê destanê ê de dest bi nê karî kerd, nika ez karê xo bi hawayêkê westayîyî rayra bena.”

Westa Ezîz 24 serrî yo nê karî keno. Westa Ezîz qalê wextê nikayî û verê nikayî keno û vano: “Verê nikayî fotografî bi makîneyanê analogan ameyêne antene. Dima ra zî fîlmê ke ameyêne antene odayêka tarîye de bi awêka kîmyewîye ameyêne şitene û dima ra zî kaxidî ser o ameyêne weşanayene. Wextê nê karî de madeyê kîmyewîyî ameyêne rişnayene, erzîyayêne awe û royan mîyan. Zirarê ci xoza û ganeyan rê estbi. Labelê saya teknolojîya avere de makîneyê fotografan ê dîjîtalî ameyî afernayene. Hendî fîlmî bi temamî qedîyayî. Sey pêroyîya dinya Amed de zî bala merdiman şina serê makîneyanê fotografan ê dîjîtalan.”

Kûrtî derheqê xo de zî va: “A game ma zî biqesawet bî. Çunke heta a game mi makîneyê fotografan ê analogan tamîr kerdêne, makîneyanê dîjîtalan ra fam nêkerdêne. Labelê wextêk ra dima ma înan ra zî fam kerd. Nê karî de zî bîya westa, labelê hewna zî mûsena, xeylî çîyî estê ke ganî merdim bimûso.” AMED