Ocalan: Ez seba çareserîye amade ya

Buroyê Huqûqî yê Asrinî derheqê pêvînayîşo ke Rayberê PKKyî Abdullah Ocalanî de kerdbî de îzehetêk da. Îzehet de ame vatene ke Ocalanî vato ‘bêrê ma problem çareser bikerî’ û wina domnayo: “Ez hewteyêk de eşkena pêrodayîşan bivindarna. Bawerîya mi esta û ez seba çareserîye amade ya. Labelê ganî dewlete zî çîyo ke hewce keno, bikero.”

Avûkatanê Buroyê Huqûqî yê Asrinî ra 2 avûkatî aşmî ra pey şîyî Girawa Îmrali û Rayberê PKKyî Abdullah Ocalanî de pêvînayîşêk viraştbî. Pêvînayîşan ra dima avûkatan îzehetêk da û derheqê pêvînayîşî de melumat da.

Îzehet de ameyo vatene ke Ocalanî pêvînayîş de mesajê muhîmî dayî û dîyar kerdo ke o seba çareserîya problemê kurdan amade yo. Buroyê Huqûqî yê Asrinî derheqê pêvînayîşî de vato ‘ma 7ê Tebaxe de muwekkîlê xo Birêz Abdullah Ocalanî de pêvînayîşêk kerdo’.

Buroyê Huqûqî yê Asrinî dayo zanayene ke Birêz Ocalanî rojeva pêroyî ser o vindeto û wina dewam kerdo: “Tena rojeva pêroyî nê, hetê ci de hetê tarîxî de têkilîya kurd û tirkan ser o zî melumat dayî û pêrodayîş û şerî ser o munaqeşeyî kerdî.”

Ganî herkes bi hawayo raşt nizdî bibo

Goreyê îzehetî, Ocalanî dewamê qiseykerdişê xo de bale anto têkilîya kurd û tirkan ser û wina vato: “Têkilîya kurd û tirkan Axlat û Milazgîr de dest pêkerdo, heta Qanûno bingeyî yo 1921î dewam kerdo. No het de dormeyê ke babete rê eleqeder î, ganî goreyê heqîqete têbigêrî. Wazenî wa Kemalîst bibo, wazenî wa fikrê Osmanîya Newe esas bigîro, ganî bi hawayo raşt nizdîyê têkilîya Kurd û Tirkan bibo.”

Ganî dewlete zî çîyo ke hewce keno, bikero

Îzehet de ameyo vatene ke Birêz Ocalan şer û pêrodayîş de israrkerdişî bi hawayo etiryaye taqîb keno û îzehet wina dewam kerdo: “Ganî herkes bivîno ke netîceyê pêrodayîş û şerê 40 serran de hetê merdimî, sîyasî û ekonomî de xeylê bedelê giranî ameyî dayene. Hewldayîşê mi yê çareserîye zî donemê Ozalî ra nata hetê kontrgerîla ra yenî sabotekerdene. No yeno zanayene. Hetê ke çareserîye nêwazenî, ewro zî eşkenî şer bivejî û no potansîyel înan de esto. Ozalî serra 1993î de vatbi ke ‘Şer reyde çareserî nîna’ û na rewşe ewro zî derbasdar a, labelê îradeya ke qerardarîya Ozalî nîşan bida, çin a. Tecrîdo ke 20 serrî yo dewam keno zî şero ke ewro dewam keno reyde eleqeder o. Herçiqas ke zehmetin bibo zî ez 20 serrî yo ke bi xeta aştîye xover dana û hewl dana biba cewab. Bêrê ma problemê kurdan çareser bikerî. Ez eşkena hewteyêk de pêrodayîşan bida vindarnayene. Bawerîya mi esta. Ez eşkena çareser bikera. Labelê ganî dewlete zî çîyo ke hewce keno, bikero.”

Gelo do huqûqêko kurdan bibo?

Îzehetê Buroyê Huqûqî yê Asrinî de ca dîyayo analîzê Ocalanî yê derheqê dewlete û aqlê dewlete de û wina ameyo vatene: “Ez vera tarîxo zûr û sexte de hewl dana ke goreyê têkilîya Kurd û Tirkan, Kurdan rê ca akera. Na çarçewa de lazimîya Kurdan bi dewletêka bîne çin a. Labelê ‘gelo do huqûqêko Kurdan bibo an nê?’. Çewres serrî yo ke ez hewl dana aqlê Kurdan ke komelo azad, merdimo azad û cuya azade gêrena bida awankerdene.”

Peynîya îzehetî de ameyo vatene ke Birêz Ocalanî Roşanê Qurbanan yê şarî pîroz kerdo û hepsîyan rê zî silamanê xo yê taybetinan erşawitî. AMED

Dikarî Biecibînî