aram

Goristanan zîyaret kerdî: Eke dewlete gaman bierza do problem çareser biba

Roja yewin ya roşanî de bi hezaran kesî şîyî mezel û goristanan ser. Kesê ke şîyî mezelê merdimanê xo ser aşitî waştî û waştî ke hukmat û dewlete gaman bierzî. Dayîka Zulkuf Gezenî Havva Gezene mezelê lajê xo ser de va: “Wa êdî ciwanê ma nêrî kiştene.” Pîyê Zulkufî Şehmuz Gezenî zî wina va: “Eke dewlete gaman bierza do problem çareser biba.”

Roja yewin ya roşanî de bi hezaran kesî şîyî mezel û goristanan ser. Kesê ke şîyî mezelê merdimanê xo ser aşitî waştî û waştî ke hukmat û dewlete gaman bierzî. Keyeyê ke şerê biserran de domananê xo şer de vindî kerdî saetanê serê sibayî de şîyî mezelanê domananê xo û merdimanê xo ser. Bi taybetî  Goristanê Yenîkoyî yê Amedî, Goristanê Asrî yê Şehitlikî yê Amedî û Goristanê Berê Mêrdînî bi girseyî ameyî zîyaretkerdene. Sewbîna goristanê Çemê Elikê û Sîsê yê qezaya Licê ya Amedî hetê keye û rayîrberanê HDPyî û MEBYA-DERî ra ameyî zîyaretkerdene. Qezaya Pîranî de zî Goristanê Pirêjman ame zîyaretkerdene. Keye gul û vilikê ke mezelanê domananê xoser de ramitbî awe dayî, duayan kerdî û waştî ke şero bîyaye peynî bibo.

Nê keyeyan ra yew ke şîyî mezelanê domanê xo ser keyeyê Zulfuk Gezenî yo. Zulkuf Gezenî tewrê grevê vêşanîye yê Hemsereka Kongreya Komela Demokratîke (KCD) Leyla Guvene bibî û seba şermizarkerdişê tecrîdê serê Rayberê PKKyî Abdullah Ocalanî Zindanê Tîpa Fyî yê Tekîrdagî de çalakîya fedaîye viraştbî û cuya xo peynî kerdbî. Mezelê Zulfuk Gezenî (33) 17ê Adare de hemverê tecrîdî de çalakîya fedaîye pê ard bi girseyî ame zîyaretkerdene. Dayîka Zulkuf Gezenî Havva Gezene mezelê lajê xo ser de va ‘wa êdî ciwanê ma nêrî kiştene.’ Pîyê Zulkufî Şehmuz Gezenî zî dîyar kerd ke eke dewlet gaman bierza do problem çareser bibo.

Badê Zulkuf Gezenî hepsîyan ra Ayten Beçete (24) 23ê Adare de Zîndanê Gebze de, Zehra Saglame (23) 24ê Adare de Zîndanê Tîpa Tyî yê Otlû de û Medya Çinare (24) 25ê Adare de Zîndanê Tîpa Eyî yê Mêrdînî de peynî ro cuya xo ardî. Yonca Akici 29ê Adare de Zîndanê Şakranî yê Cinîyan de çalakî viraşte û 1ê Nîsane de cuya xo vindî kerde. Siraç Yuksekî zî 2ê Nîsane de Zîndanê Tîpa T-2yî yê Osmanîye de û Mahsûm Pamayî zî 5ê Nîsane de Zîndanê Xarpêtî yê bi Asayîşê Berzî de bi heman amacî çalakî viraştî û cuya xo peynî kerdî.

Pîyê Zulkuf Gezenî Şehmuz Gezenî roşanê heme keyeyê ke domananê xo şer de vindî kerdî pîroz kerd. Gezenî bale ant mesajê Ocalanî yê peynî ser û va: “Birêz Ocalan reyna aştîye de israr kerd. Ganî êdî dewlet gaman bierza. Eke dewlete gaman bierza do problem çareser biba.”

Hetêk ra bi hezaran kesî şonî zîyaretê mezelan û hetêk ra zî xeylê mezelê ke hema kamîya înan dîyar nêbîya estî û goristananê bêkesan de ameyî definkerdene. Taybetî badê şerê 24ê temmuza 2015î ame îlankerdene, bi seyan kesî cuya xo vindî kerdî û kamîya înan nêameyî dîyarkerdene.

19ê kanûna 2017î de dewa Oleka Corîn ya Bedlîsî, Goristanê Xerzanî ra 267 cenazeyî bê xeberan keyeyan ameyî vetene û înan berdî Dezgeyê Tibê Edlî (ATK) yê Stenbolî. 267 cenazeyan ra 265ê ci 20 aşmî yo ke ATKyî de yenî vindetene. Heta nika tena 2 keyeyî cenazeyanê xo girewtî. Her çiqas ke ATK numuneya gonî keyeyan ra bigîro zî cenaze teslîmê keyeyan nêameyî kerdene. AMED

Dikarî Biecibînî