Rayîrberê şenik bi 3 ziwanan Kela Wanî danî şinasnayene

Domanê ke emrê înan mabenê 10 û 15î de bedilîyeno, turîstanê xerîban rê rayîrberî kenî û tarîxê Kela Wanî bi kurdî, tirkî û japonî danî şinasnayene

Qezaya Tuşba ya Wanî bi kela ke hetê Urartuyan ra ameya viraştene û heta ewro ameya pawitene bale ancena. Dormeyê kela Wanî de çîyo tewr balkêş oyo ke domanê ke emrê înan mabenê 10 û 15î de bedilîyeno turîstanê ke yenî zîyaretê kele rê bi ziwanê kurdî, tirkî û japonî tarîx vajenî.

Nê domanê şenikî hetê turîstan ra eleqeyêko gird vînenî. Labelê seba ke Mudirê Turîzmî dekewtişê mîyanê kele bi peretî kerde, domanî zî bi rayîranê qedexeyan dekewenî mîyanê kele û turîstan rê rayîrberî kenî û tarîxê kele vajenî.

Domanan ra Caner Sonerî tarîxê Kela Wanî wina vano: “Kela Wanî badê mîladî serra 843î de hetê yewin Sadûrî ra ameya viraştene. Na kele de 9 nuşteyê bi bismarin estî û 12 goristanî tede estî. Cayo ke kele tede ameyo awankerdene de 4 camî û 2 kêrî zî estî. Kela ke kewena qeraxê Wanî bajar ra 5 kîlometre dûrî ya.”

Gureyo ke ma kenî cîyayeyêk dano kele

Domanan ra Baran  Sonerî zî bi ziwanî japonî tarîxê kele vano û qiseykerdişê xo de wina va: “Ma hetê nobedar û pawitoxê kele ra yenî astengkerdene. Seba ke dekewtişê kele bi pere yo, ma bi rayîranê qedexeyan dekewenî kele. Tu zirarêk ma kele rê çin o. Hedefê ma tena oyo ke ma tarîxê tîya turîstan rê vajî. Verê cû zî birayê ma no gure kerdêne. Ma wazenê ke her kes tarîxê kele bizano. Gureyo ke ma kenî zî cîyayeyêk dano kele.” WAN

Dikarî Biecibînî