Hepsîyan veng dayî TTByî

Hepsîyê Zîndanê Tîpa Fyî yê Bolû dîyar kerdî ke Nurullah Semo 2 serrî yo ke hucre de tena yeno tepiştene û ci rê îşkence yeno kerdene

Hepsîyê  Zîndanê Tîpa Fyî yê Bolû dayî pêhesnayene ke Nurullah Semo 2 serran ra nata tena hucreyêk de yeno tepiştene û zafê heqê înan yenê binpaykerdene û verba têgêrayîşê doktoran û muayenekerdişê pê kelemçeyan veng dayî TTByî .

Ame zanayene heqê hepsîyanê Zîndanê Tîpa Fyî yê Bolû yenê binpaykerdene. Hepsîyan pê nameyanê zîndanî ra erşawitî behsa çîyanê ke ûca qewimîyenê kerdî. Hepsîyan dayî zanayene ke hepsî Nurullah Semo 2 serrî ra nata tena kogûşêk de yeno tepiştene û gardîyanî her serê sibayî wextê hûmaritişî de heqeretan ci rê kenê. Hepsîyan vatî badê hende îşkenceyo sîstematîk asayîşê ey nêmendo.

Veng dayî TTByî

Hepsîyan ardî ziwan ke doktorî goreyê dozan yê hepsîyan ke yenê hukmkerdene, muamele kenê û muayenekerdişê bikelemçeyan yeno ferzkerdene û na rewşa verba prensîbanê karî yê hekîmtîye ya. Hepsîyan veng dayî Yewîya Tabîbanê Tirkî (TTB) û wina vatî: “Wexto ke ma wazenê ma berê revîr, ma nêbenê. Heta aşmêk derbas bena, ma benê. Waştişanê lezabezan verî xo kor, lal û kerr kenê. Ma veng danê TTByî: doktorê ke endamê dezgehî yê şima yê û sondê Hîpokratî wendî goreyê dosyaya ma wa pê çimêko kîn û nefret ma ra meewnîyê.”

Pêro heqê înan yê bingeyênî û komelkî yenê destsernayene

Hepsîyan vatî ke nameyê înan bi hawayêkê sîstematîkî yenê vînkerdene û gardîyanî kolîyanê ke hepsîyan rê yenê mîyanê xo de vila kenê. Hepsîyan ardî ziwan ke pêro heqê înan yê bingeyênî û komelkî yê sey qiseykerdişê telefonî, pêvînayîş û zafê çîyê bînî yenê destsernayene. AMED