Kekoyê Ceylan Onkole: Kesî vengê dadîya mi nêeşnawit

Qetilkerdişê Ceylan Onkole ser ra  10 serrî vîyartî, la hema zî kiştoxê aye nêameyî cezakerdene. Kekê Ceylane Rifat Onkolî vat ke kesî vengê dadîya ci nêeşnawit û serê serebûtî pada

Ceylan Onkola 14 serre ya ke 10 serrî cuwa ver hetê dewleta Tirkî ra ameye qetilkerdene kiştoxê aye ke eşkera yê hema zî nêameyî cezakerdene.

Ceylan Onkole (14)  28ê Êlule 2009î de mezra Xanbazî ya pabesteya dewa Kanîspî ya qezaya Licê ya Amedî de, wexto ke heywanî çerênayene, rastê guleyêkê hewano ke hetê qereqolî ra amebi eştene, ameyebî û wefat kerdbi. Dadîye Salîha Onkola ke perçeyê kênaya xo pêşê xo de kom kerdibî, pêro delîlî cayê serebûte de dîyî teslîmê Serdozgerîya Komare ya Licê kerdibi. La rixmê naye dozgerî serra 2014 de qerarê ‘cigêrayîşê daîmî’  û dosyaya tahqîqatî bê cezakerdişê qetilkaran qefilna.

Kekê Ceylan Onkole Rifat Onkolo ke cayê serebûtî de Ajansê Mezopotam ya reyde qisey kerd, vat ke her çiqas înan pêro delîlî teslîmê dozgerîye kerdî zî, ser serebûtî ame padayene. Mezra Xanbazî çend keyeyan ra yena meydan, manena wareyan. Cayo ke Ceylane ameye qetilkerdene û vêşaya, kereyê ke pê înan tîpê c’yî yeno viraştene estî. Rifat Onkolî va: “Tam tîya  waya mi ameye qetilkerdene. No goristan zî hetê dadîyanê ke serebût dîyî û hîs kerd, merdimanê hîstenikan ame viraştene. Armanc yadkerdişê Ceylane yo. No ca sembolê wehşet û vîrameyîş o.”

‘Roşnayîya çimanê Ceylane tarî kerde’

Kekê Ceylane Onkolî vat eke a roje Ceylane nêameyêne qetilkerdene cemê şanî dewa Yayla ya Çewlîgî de şiyêne dibistane. Ceylane têna mêşnayî nêçerênayene heman wextî de wendêne û tim belgeyê serkewtişî ardêne. Destûr nêdîya ci bicuye û biwano. Çimê aye yê zelal û bitesîr bibî. La a qetil kerd û roşnayîya ci hewna kerde.

‘Kesî vengê dadîya mi nêeşnawit’

Rifat Onlojî  derheqê qewimîyayîşî de nê vatî: “Wexto ke Ceylane ameye qetilkerdene, dadîya mi perçeyê bedenê aye nê cayan ra pêşê xo de dayê arê. Dadîya mi dejê xo wina va ‘Qey Homayî Ceylana mi şîya, Yewna Ceylane wa nêşora û hînî domanî, merdimî nêrê kiştene.’ Dadîya mi pê nê vatişanê xo veng da selahîyetdar û îdarekaran. La kesî vengê dadîya mi nêeşnawit. Teyna ser serebûtî pada. Nê zî dadîya mi ser zaf tesîr kerd û a nêweş kewt. Nika dadîya mi dest û payan ra kewt a.

‘Serbût ame peygoşkerdene’

Pêro delîlî ameyî wedaritene û ser serebûtî ame padayene. Wexto ke serebût bi, ma veng da dozgerî, Qereqolê Abaliyî ke ma vat pêro delîlî kifş ê, şima se kenî bikê. Lê nêameyî. Pêro firsendê teknîkî zî estbî lê serebût ame peygoşkerdene. Heta nika qeraro ke serebût roşnî bike û zerrîya ma rehet bike nêame dayene. Roja destpêkî ra heta nika peygoşîye esta. Ne 28 hezar, 28 mîlyar zî bidê heta ke kiştoxî nêvejê meydan ma do razî nêbê. Bi heronû wesayîtanê bînan ma tim binê tehdîtî de yê. Beno ke Ceylanê bînî zî bimirê. Ma wazenê ser erdê xo de welatê xo de rehet û asan bê.” AMED