Erjayeyê Dêrsimî dêsan de xêz kerdî

Yûsûf Înan Guneşo ke hunermendê Mûralî yo, seba ke bawerî, cuye, kultur û xozaya Dêrsimî bido ciwîyayene yew pezkovî û dadîya Dêrsimije xêz kerdî

Çarçeweya 1. Festîvala Muralî ya Dêrsimî de Dêrsim de zafê dêsî pê hunerê mûralî ameyî rengkerdene. Mûral; xêzkerdişê dêsan, serke yan zî wareyo pîlî ser o pê boyaxkerdişî viraştişê hunerî yo yanî ressamîya dêsî ya.

Yûsûf înan Guneşî Parka Mamekîye de xebatê xo kerdî û erjayeyê kulturî yê Dêrsimî xêzanê xo de nawitî. Guneşî îfade kerd ke ganî merdimî welatê xo reyde pê rayîrê hunerê ey nas bibê û no zaf girîng o ke merdimê ke teberî ra yenê rewşa estetîkê şaristanî bivînê. Guneşo ke erjayanê herême ser o xebetan keno va: “Ez verê Munzurî de xebatanê xo kena, no seba mi zaf girîng o. Mi waşt ke erjayanê Herêma Dêrsimî ser o tayê xebatan bikerî. Dadîyê ma erjayeyê tîya yê yewin ê, êyê diyîn zî xoza û pezkovîyê temsîlkarê xozaye yê ke nê tewr nêvurîyenê. Ez xebitîyayîşê fîguran ê aîdê şarî ra hîna zaf hes kena. Ez zaf şay a ke mi dêso verê şaristanî ser o hunerê xo viraşt.”

Guneşî qala Koyê Munzurî ke sey wareyê madenî ameyî eşkerakerdene zî kerd û va: “Dimayê koyanê Kazî, Koyê Munzurî zî sey wareyê madenî ameyî eşkerakerdene. Xozaya Dêrsimî bêhempa ya, dinya ser o yew têduştê ci çin o. Sey yew hunermendî ez wina fikirîyeno ke wareyê madenî qerarêko xelet o. Na xoza beno ke yew mîlyon serrî de ameye meydan. Seba panc serran bi hewayêkê winasênî bêra çinkerdene. Eke xozaya Munzurî vînî biba, kulturê ci zî vînî bena.” DÊRSIM 

Dikarî Biecibînî