Waştişê tepiştişê vergumananê doza JÎTEMî yê Kerboranî ame redkerdene

Avûkatan doza ‘JÎTEMî yê Kerboranî’ de waşt vergumanî bêrê tepiştene. Heyetê mahkeme reyêka bîne waştişê avûkatan red kerd

Roniştişê 16’in ê doza ‘JÎTEMê Kerboranî’ 30ê Teşrîna Verêna 2014 de amebi destpêkerdene, 1. Mahkemeya Cezaya Giran ya Semsûrî de ame dîyene. Fermandar û leşkerê ke înan herêma Kerboranî de mabênê serranê 29ê Teşrîna Verêna 1995 de û 1996 de 3 domanî û 8 hemwelatijî vînîkerdî û kiştî, na dosyaye ra yenê hukmkerdene. Avûkatan ser nameyê keyeyan dewaye akerdibi. Mahkeme de avûkatî û keyeyî amade bîyî.

Fermandarê Komandoyê Kerboranî yê o wextî Hurşît Îmren, Fermandarê Qereqolê Merkezî yê o wextî Mahmut Yilmaz, Çawuşo Pispor yê o wextî Haydar Topcan û Faruk Çatak zî tede nê kesî yenê hukmkerdene. Vergumanan ra kesêk o wextî ewca leşkerî kerdêne bi rayîrê dîmen (SEGBÎS) beşdarê mahkeme bi. Leşkerî da zanayene ke nê serebût nêno vîrê ey, çîyêk nêzaneno û wayîrê selahîyetêk nîyo. Keyeyê mexduranê ke beşdarê mahkeme bîyî waşt ke dewa hînî bêra qedînayene û kiştoxî bêrê cezakerdene. Avûkatanê keyeyan zî sey roniştişanê bînan nê roniştişî de zî waşt ke vergumanî bêrê cezakerdene û kêmasîyê estî mîyan ra bêrê wedaritene. Heyetê mahkeme waştişê cezakerdişê vergumanan red kerd û roniştiş taloqê 12ê Kanûne kerd. SEMSÛR