7. Fuarê Kitaban yê Amedî de kitabê balkêşî cayê xo girewtî

Weşanxaneyê Rûpelî bi kitabanê xo yê balkêşan bale anceno xo ser û 7. Fuarê Kitaban yê Amedî de cayê xo girewto. Weşanxaneyê Rûpelî veng da wendekran ke tewr zêde bala xo bidî kitabanê kurdî ser

Amed de 7. Fuarê Kitaban yê Amedî bi tewrbîyayîşê 130 weşanxaneyan û 220 nuştox û şaîran ke 4 rojî yo ameyo akerdene dewam keno. Mîyanê roje de xeylê aktîvîte û şahîyê cîya-cîyayî yenî viraştene û organîzekerdene. Nizdîyê 20 weşanxaneyê kurdî zî tewrê fuarî bîyî. Nê weşanxaneyanê kurdî ra yew zî Weşanxaneyê Rûpelî yo. Weşanxaneyê Rûpelî bi kitabanê xo yê balkêşan bale anceno xo ser û dezgeyan ser de kitapanê cîya-cîyayî rêz kerdo.

Kitabê ke dezgeyê weşanxaneyî ser de ameyî rêzkerdene pêro zî xebatê cigêrayîşî yî. Dezge ser de kitabê bi zarawayê kirmanckî (Zazakî) zî estî.

Çend kitabê ke dezge ser de bale ancenî ra tayê ci wina yî: “Le Monde diplomatique kurmancî Gotarên Redaksiyona Kurdî 1, Le Monde diplomatique kurmancî Gotarên Redaksiyona Kurdî 2, Le Monde diplomatique kurmancî Arşîva Bîra Kurdan, Nameyên Nuredîn Zaza, Kulê 38î yê bi zarawayê kirmanckî ke qala jenosîdê Dersimî keno û Edebîyatê Fekkî yê Kirmanckî yê Herêma Sêwregî.”

Berpirsîyarê Weşanxaneyê Rûpelî Şenay Kumuze daye zanayene ke ê hem bi kitabanê xo yê cîya-cîyayan yê bi zarawayê kurmancî û hem zî bi zarawayê kirmanckî fuar de yî û hewl danî ke wendekarî bêtir bala xo bidî kitabanê kurdî ser. AMED