Eşkerayîya Qesra Sipîye ya derheqê agêrayîşî de

Qesra Sipîye da zanayene ke Tirkîya do ‘wextêko nêzdî de’ operasyonêk bike û ê zî sînor ra apey agêrenê û naye ra tepîya Tirkîya do DAIŞijanê tepişteyan ra berpirsîyar bo

Dima ke Serekkomaro tirk Recep Tayyîp Erdoganî bi Serekê DYA Donald Trumpî pê telefonî qisey kerd, DYA hêzê xo yê serê sînorê Federasyonê Vakur û Rojakewtena Sûrîye apey antî.

Eşkerayîya Qesra Sipîye de ame vatene: “Tirkîya do wextêko nêzdî de verba Vakurê Sûrîye operasyonêk bike.”

Eşkerayîya nuştekîye de ame parbekerdene: “Hêzê Amerîka do paştî nêdê operasyonî, do tewrê operasyonî nêbê û hêzê Amerîkayê ke xalîfetîya Dewleta Îslamî mexlûb kerde, hînî do wareyêko nêzdî de nêmanê.”

Qesra Sipîye derheqê detayanê operasyonî yê îşxalkarîya tirkî de xebere eşkera nêkerde.

Qesra Sipîye derheqê çeteyanê DAIŞî yê ke destê Hêzê Sûrîyeya Demokratîke (HSD) de tepişte yê de wina va: “Hukmatê DYA zaf reyan Fransa, Almanya û welatanê bînan ê Ewropa ra waşt ke şervananê Dewleta Îslamî yê tepişteyanê ke welatanê înan ra yê, bigêrê. Labelê ê nêwazenê û red kenê. (…) Tirkîya do nika ware de berpirsîyara nê pêroyê şervanan ê Dewleta Îslamî yê ke di serran ra nata herême de tepişte yê, biba.”