Parlamentera Almanya Luhmanne: Qeyûm rojeva Ewropa de yî

Parlamentera Partîya Soyal Demokrate ya Parlamentoya Federal ya Almanya Krîsten Luhmanne seba piştîayîşê HDPyî ameye Amed û dîyar kerde ke caardişê OHALî dewam kenî û tayînkerdişê qeyûman rojeva Ewropa de yo

Seke yeno zanayene dewleta tirkî 19ê tebaxe de şaredarîyê hîrê bajaranê pîlan yê Amed, Wan û Mêrdînî yê Partîya Demokratîke ya Şaran (HDP) xesp kerde. Şarê kurdî aye roje ra nata meydanan de yo. Parlamentera Partîya Sosyal Demokrate ya Almanya (SPD) Krîsten Luhmanne zî seba ke paştî bida HDPyî ameye Amed. Luhnmanne derheqê xoverdayîşê kurdan yê vera xespê qeyûmî de Ajansê Mezopotamya rê qisey kerde.

Luhnmanne ard ziwan ke ê zî polîtîkayê qeyûmanê tirkî nêzdîye ra taqîb kenê û va: “Wexto ke weçînayîşê 31ê Adare de hemşaredarê kurdî amebî weçînayene,  ez zaf şay bîya. Ez pê bawer a ke hemşaredarê  weçînayeyî seba ekonomî zerrîye ra do bixebitê. Ez tayînkerdişê qeyûman ê şaredarîyanê Amed, Wan, Mêrdînî ra qet razî nîya. Ez seba ke paştî bida hemşaredaranê Kurdan awil şîya Mêrdîn, dima ez ameya Amed. Ez zî sey çalakgerêke Amed de û verba qeyûmî de ya. Ma rewşa Tirkîya tim taqîb kenê, delîlêk çin o ke nê şaredarîyanê kurdan paştî daya rêxistinan. Ganî dewlete na îddîaya xo îsbat bike. Semedê tedayan ma nêeşkenê verê Şaredarîya Pîl a Amedî de çalakîye bikê. Cinî, camerd, ciwan, doman herkes wayîrê îradeyê xo vejîyenê. La hûmara polîsan hûmara çalakgeran ra hema hema di rey zêdêr a. Meydan hetê polîsan ra ame dormegirewtene. Meseleyê kurdî yê Tirkîya têna pê rayîrêko demokratîk û haştîyane yenê çareserkerdene. Meseleyê kurdî pê şîdet û şerî çare nêbenê. HDP seba çareserîyanê nê meseleyî rolêk û mîsyonêk girewt serê xo. Ganî nê welatî de herkes pê ziwan û nasnameyê xo biciwîyo.” AMED