Bêtefaqîya ma xetereyê qirkerdişî virazena

 

Ancî dişmintîya ro Kurdan ancî dagirkerdişê parçeyêke welat û qirkerdişê şarê Kurdî kewt rojevê heme dinya! Çi heyf ke na raştîyêke ya ke heta Kurdî tefaqe xo nêkerê yew, fek îxanet û xorotişîya xo ra verra nêdê go dagirker û emperyalîstî estoranê xo warê înan de bi rehetî bidê vazdnayîşî û bê ters, bê şerm û fedî şimşêre xo milê înan ser de tûj bikerê.

Ma sayidê bêtefaqî û bêxemîya xo ra ancî bî şahid ke Tirkîye rayêke bîne bi artêşe xo, partîyanê xo, bi sivîlanê xo û heta ma eşkenê vacê bi qic, pîl û extîyaranê xo ya dişmintîya xo ya şarê kurdî rê pratîk de bimojnê ra û di fikrê xo yê qirkerdişê şarê Kurdî de bibê yew î. Eke wina nê yo çi eleqeyê înan Rocawan ra esto ke artêşa înan bi tanq, top û teyaranê xo ya sînoran derbas kena û bi partîyanê desthilatî ra bigî heta yê muxalefetî, sazîyanê înan ra bigî heta qaşo hunermendanê înan borazanîya qirkerdişê şarê Kurdî kenê?! Erê eynî wina yo dişmintîya pergal û îdeolojîya rayveberîya Tirkîye ya Kurdan rê sînoran zî derbas kena. Sînorê exlaqî, sînorê wijdanî, sînorê bawerîyan û sînorê heme merdimahî bi xo zî derbas kerdo!

Senîn ke vizêrî emperyalîst û dagirerî anyayî zerreyê çimanê ma ra û bi rehetî welatê ma bi çar sînoran kerd perçe eyro zî eynî aktorî kewtê dewre anênê zerreyê çimanê ma ra û her hewe qirkerdişê xo perçeyêke ma de ma ser de pêk anê. Mesela ne Tramp tenê yo mesela heme dewletê emperyalîst ê, mesela ne Erdogan, AKP, MHP, CHP û partîyê bînî tenê yê mesela îdeolojîya dewletêka dagirker û nîjadperestî û faşîztîya miletêke ya. Û tewr muhîm mesela ne perçekerdiş yan dagirkerişê perçeyêke ya mesela bêtefaqî û îxanetê ma bi xo ya.

Ma zanê tarîxe destpêkerdişê dagirkerîya welatê ma ra heta eyro hetê dagirker û emperyalîstan ra zehf kayî, zehf dek û dolabî û zehf qirkerdişî welatê ma û şarê ma ser de pêk ameyî la sebebo sereke yê heme kerdişanê înan çi heyf ke bêvengî û bêtefaqîya ma bîya. Bêtefaqîya ma bi xo xetereyê qirkerdişî virazena. Kobanê û Efrîn di mînakê zehf akerdeyê semedê Kurdan. Ma Kobanê de dî ke wexta Kurdî yewî bê dinya bi înan nêşkena û çi hefy ke ma Efrîn de dî ke wexta Kurdî bêveng bimanê ne war ro înan maneno ne azadî û ne zî ciwîyîn! Eke ma hesabê çarparçekerdişê welatê xo emperyalîstanê dinya yê sey Ewropa, Emerîka, Rûsya ra biwaştêne, ma pey heqê azadîya xo de bişîne eyro roc înan cesaretê dayîşê qeraranê qirkerdişî ma ser de nêdîne. Çi heyf ke ey bi ma bawer ê ke ma senîn çarperçekerdişê welatê xo de bêveng mendî û înan ra hesab nêwaşt ma qirkerdişanê xo ser de zî bêveng manenê û hesab înan ra nêwazenê. Heta ke ma qisûran bîyarê jobînan ser û ma dagirkeranê welatê xo xo rê nizd û sey birayan bivînê go xetereyê qirkerdişan bidomyo. Dagirkeran dir çi ray biratî û dostanî nêbena. Lazim o ma baş bizanê û xo nêxapênê, îdeolojîya dagirkeran a sereke û nêbedelnayî bindestverdayîş û raste ra wedartişê şarê Kurdî yo û na îdeolojî destpêkerdiş ra heta eyro nêbedelyawa û go nêbedelyo. Bêtefaqî welatê ma dayo dagirkerdişî lazim o ma bi yewîtîya xo welatê xo dagirkeran ra feletnê.

Dikarî Biecibînî