aram

Verê çimanê dinya de bombayî sivîlan ser o varnayî

Mîhrîcan Newaf Silêmana ke hêrişê dewleta tirkî yê Serêkanîyê ra bi birîndarî xelisîyaye va: “Erdoganî verê çimanê dinya de sivîlan ser o bombayî varnayî.”

Serêkanîyê de dewleta tirkî ya îşxalkare bombayî konvoya sivîlan ser o varnayî ke herêma Cizîre ra amebi û muxabirê ANHA Seed Ehmed zî tede 11 kesî şehîd bîyî û tewr tay 74 kesî zî birîndar bîyî. Birîndaran ra Mîhrîcan Newaf Silêmana ke Nêweşxaneyê Rahme yê Qamişlo de yena weşkerdene, ANFyî rê behsa hêrişî kerde.

Silêmane parbe kerd ke Amûdê ra seba paştdayîşî ameye Serêkanîyê û va: “Seba ke ma nîşan bidê ke Serêkanîyê têna nîya, şarê rojawanî û vakur û rojhelatê Sûrîye payan ser ê ma ameyî Serêkanîyê. Seba ke bibê moral ma xoverdayoxanê Serêkanîyê reyde bi coşî kewtê rayîr. Konvoya ma de têna Kurdî çinebî, Erebî zî estbî. Ma vatêne ke ma Serêkanîyê têna meverdê û ma kewtê rayîr. Seba paştdayîşê ma kewtê rayîr. Merdimê ke konvoye de bîyî hema vajê pêro kalpîrî bîyî. Mabênê înan de tewr ciwan ez bîya û ma pêro sivîlî bîyî. Mabênê ma de şervan çinebi. Erdogan vano ‘Armancê ma çinkerdişê terorî yo.’ Ma terorîst nîyê, ma şarê nê erdî yê. Armanco esas ê Erdoganî çinkerdişê xoserîya demokratîk o ke şarê Kurdî, Sûryanî û Erebî pîya yê. Wazeno dişmenîya bifisne mabênê nê şaran. Her kes zanayêne ma kam ê û teyarayê ke înan hêrişê ma kerd, kamca ra ameyî. Pêroyê dinya û rêxistinanê heqanê merdiman rê vana; verê çimanê şima yê pêroyînan de bi teyarayanê şerî sivîlî ameyî qetilkerdene. Gelo barbarîya winasêne kamcayê dinya de amebi dîyene? Dinya verê na barbarîye de bêveng a. Eşkerayîye ra ber çîyêk nêkenê. Erdoganî rê vana; pê kiştişî ti nêeşkenî ma biqedne. Kurdî do erdê xo bipawê.”

 ‘Xoverdayoxî ma rê bîyî hêz’

Silêmane daye zanayene ke şervanê HSDyîyê ke verba hêrişanê barbarîyan ê dewleta tirkî xo ver danê, zaf xurt ê û va: “Seba ke şervanan rê bibê hez ma şîbî, labelê ê ma rê bîyî hêz. Dewleta tirkî vizêr bi eşkerayîyan îdîa kerd ke înan Serêkanîyê fisnaye destê xo. La eşkerayîyê înan ê pêroyî zûr ê. Serêkanîyê hema zî kontrolê HSDyî de ya. Ganî naye baş bizanê; seba ke ma şîyê Serêkanîyê, ma qet poşman nîyê. Ma zaf kêfweş bîyî û şervan ma rê bîyî hêz. Ganî ma nê qirkerdişanê Dewleta tirkî qebul nêkerê. Bombayî serê sivîlan, serê kalpîran rê yenê eştene. Wa Homa heqê şehîdan û birîndaran Erdoganî rê meverdo.” QAMIŞLO 

Dikarî Biecibînî