Cinîya Bexdadî ke Erdogan vatbî ê tepiştî serra 2018î de Hatay de ameya tepiştene

Merkezê Xeberan

Badê ke Serekê DAIŞî El Bexdadî ame kiştene, Serekê AKPyî Erdogan zî 5ê teşrîna peyêne de va ‘Reya yewina ke ez eşkera kena’ û tepiştişê cinîya Bexdadî îlan kerd. Labelê vejîya raşte ke cinîya Bexdadî Serra 2018î de Hatay de ameya tepiştene. Ajansê Xeberan yê Alman dpa eşkera kerd ke cinîya Bexdadî Esma El Kubeysî par tewrê 10 kesan Hatay de ameya tepiştene

Serekê DAIŞî Ebubekir El Bexdadî 27ê teşrîna verêne de Îdlib de operasyonê hempare yê HSD û DYAye de serê sînorê Tirkîya û Îdlibî de ame kiştene. Badê ke Bexdadî ame kiştene Serekê Pêroyî yê AKPyî Tayyip Erdogan kombîyayîşê 5ê teşrîna peyêne de va ‘Reya yewina ke ez eşkera kena’ û dîyar kerd ke Cinîya Serekê DAIŞî Bexdadî Esma El Kubeysî ameya tepiştene. Labelê vejîya raşte ke cinîya Bexdadî Serra 2018î de Hatay de ameya tepiştene. Ajansê Deutsche Welle xebere barê Ajansê Xeberan yê Alman dpa kerd. Xebere de qala detayanê operasyonê Hêzê Sûrîyeya Demokratîke (HSD) û hêzê DYAye ke Serekê DAIŞî Ebubekir El Bexdadî Îdlib de ame kiştene, ame kerdene. Xebere de ame vatene ke Cinîya Bexdadî Esma Feysi Muhammed El Kubeysî 2ê hezîrana 2018î de tewrê 10 sucdaranê DAIŞî Hatay de ameya tepiştene. Xebere de ame dîyarkerdene ke mîyanê kome de ci ra yew camêrd, 4 cinî û 6 domanî estbî û kamîya Esma demêk kilm de ameya zelalkerdene. Xebere de vatene ke mîyanê koma ke ameya tepiştene de kênaya Bexdadî zî estbî û kamîya kênaya Bexdadî netîceyê testê DNAye de eşkera bîya û nameyê aye Leyla Cebir a.

Erdogan 5ê teşrîna peyêne de pesnê xo dabî û dîyar kerdbî ke ê cinîya Bexdadî tepiştî.

Dikarî Biecibînî