Onlu: Wa Terteleyê Dêrsimî her hetî ra bêro cigêrayene

Parlamenterê HDPyî yê Dêrsimî Alîcan Onluyî seba ke Terteleyê Dêrsimî bêro cigêrayene vernîyazê persî da meclîsî

Parlamenterê Partîya Demokratîke ya Şaran (HDP) yê Dêrsimî Alîcan Onluyî seba ke Terteleyê Dêrsimî bêro cigêrayene, gorê Seyîd Rizayî, lajê ey û embazanê ey bêrê dîyene vernîyazê persî da meclîsî.

Alîcan Onluyî bale ante raporê Serfermandarê ê wextî Fevçî Çakmakî yo ke dabi Serekwezîrîye ser û va: “Raporî de yeno vatene ke ganî lezabez vera Dêrsimî tevgêrayîşo leşkerî bêro kerdene û sebebê naye zî şarê Dêrsimî kurdkî qisey kenê û kenê ke kurdkî vila biba.”

70-100 hezar kesî ameyî qetilkerdene

Onluyî vernîyazê persî seba ke Hetkarê Serekkomare Fuat Okayî cewabê ci bido da Serekîya Mezlîsî zî. Persê vernîyazî wina yê:

“* Gorê Seyîd Rizayî û embazanê ey kotî de yê? Arşîvê dewlete de derheqê nînan de qeydêk esto?

* Seba ke gorêkê ci nêbo leşê Seyîd Rizayî ame vêşnayene? Eke wina yo kamî û kotî de leşê ey ame vênayene?

* Mabênê serranê 1930-1940î de nufusê Dêrsimî çendek bi?

* Tarîxanê 1937/38/39î de Dêrsimî de çend hemwelatîyî ameyî qetilkerdene û Terteleyê Dêrsimî ra dima çend kesî dayîyayî koçkerdene?

* Derheqê kêneyanê ke keyeyan înan  ra ameyî girewtene û ameyî dayene keyeyanê leşkeran de arşîvê Dewlete de qeydêk esto? Çend kêneyî amebî dayene kesanê bînan?

* Dokumentê Dêrsimî yê ke derheqê înan de birra nimnayîşî esta gelo do rayaumûmîye reyde bêrê parekerdene?

* Seba ke Komîsyona Rastîya Dêrsimî bêra sazkerdene gelo şima do çîyêk bikê?” ANQARA 

Dikarî Biecibînî