Asayîşê canê hepsîyan çin o

Îdarekara TUAY-DERî avukate Aslihane Bulute derbarê îşkenceyê serê hepsîyan de qisey kerde û va: “Hepsî dîyar kenê ke asayîşê canê înan çin o

Dewleta tirkî zîndananê Tirkîya û Kurdistanî de îşkenceyê xo zêdeyêr kena. Bi taybetî Zîndanê Tîpa D û Tyî yê Amedî û zîndananê cinîyan û yê hûmara 2. yê Xarpêtî de îşkenceyî bîyê zêdeyêr. Komela TUAY-DERî çend rojî verî dîyar kerdîbî ke awukatê înan şîyê nê hepisxaneyan û raporêk weşanaybî. Îdarekara TUAY-DERî avukate Aslihane Bulute ANFyî rê behsê nê raporî kerd.

Avukate Aslihane Bulute dîyar kerd ke Amed û Xarpêtî de cezayê dîsîplînî bîyê zêde û bi nê cezayan wazenê ke hepsîyî mêrê veradayene. Awukate Aslihane Bulute dîyar kerd ke zîndananê cinîyan ê Xarpêtî de seba ke yew hepsîye tîşortê girane V dayo xora mudurê hepisxaneyî bi bahaneyê “gore ehleqî kincan nêdana xora” cezaya dîsîplînî daya ci. Bulute vat ke “nê cezayanê dîsîplînî ra serkewte hepsîyî nênê veradayene. Keso ke ganî aşma êlule de hepisxaneyî ra vejîyo do encax aşma adare de vejîyo.”

Zîndanê Xarpêtî de galê fizîkî

Bulute dîyar kerd ke Zîndanê Xarpêtî de îşkenceyê fizîkî zî rojeve de yê û va: “No îşkence rewna yo esto, ma gilîyê sucî kenê la tewr netîceyek nêfînenê xo dest. Hepsî demo ke derb benê destûre nêdayîna înan ke şorê doktor û rapore bigêrê. Seba ke raporê derbkerdişî çin ê birra teqîb nêkerdîşî yê gilîyê sucî dayîna. Îşkenceyê fîzîkî ra sewbîn îşkenceyê psîkolojîk zî êno kerdene.”

Odayan de kapasîta ra cor hepsî estê

Awukate Bulute derheqê Hepisxaneyê Mêrdînî zî agahî daye û vat: “Nê zîndanî de kapasîta ra cor hepsîy estê. Mîyanê nînan de nêweşê giranî zî estê û taye kesî erd de rakewenê. Hepsîyêk seba ke kewto grevê veyşanîye çime xo ra bîyo la hîna teşhîsê ey zî nîyamo kerdene. Teberê nînan de problemê awe zî esto. Serê her hepsîyî rojêke de 50 lître awe danê. 50 lîtreyan ra dima awe birnenê.”

Hepsî: Beno ke ma bikişê!

Awukate Bulute dîyar kerd ke zîndanê numra 2. yê Xarpêtî de galê 15-20 hepsîyan kerdo û vat: “Ma dî ke hepsîyêk nêeşkeno qisey biko û bi hawayêko giran ameyo derbkerdene. Aşmêke ra dima ke ma şîme eynî zîndanî hepsîyan dîyar kerd ke emnîyetê înan ê canî çin o û înan ma ra vat ‘beno ke tîya ma bikişê.’ Ma nê gilîyan bi rayîrê çapemenîye danîme eşnawitene la dima birra teqîbnêkerdişî êna dayene.”

Zerê werdî ra pîsîye vejîna

Awukate Bulute behsê problemanê Zîndanê Amedî zî kerd û va: “Hepsîyan dîyar kerd ke zerê werdê înan ra muy, pîsîya merreyan û camî vejîyenê. Nê camê zerê werdî ra serkewte ziwanê hepsîyêk birîyayo. Ma seba na yewe muracat kerd la tewr netîceyêk nêgirewt. Nê werdan ra serkewte hepsîyî kewtîbî grevê veyşanîye. Werdî kêm dayînê hepsîyan, nêeşkenê xo tam mird bikerê.” AMED 

Dikarî Biecibînî