Fusun Demîrel: Ez sahne de qala nêseyyewbînanî û şîdetî kena

Hunermenda tîyatroyî û sînemayî Fusun Demîrela ke kayê ‘Dersê Evînî’ kay kena reaksîyon nîşanê şîdet û hêrişê zayendî yê hemverê cinîyan û domanan daye û va: “Herinda ke komel aver şêro her ke şono tepîya şono. Ganî ma têkoşînêko topyekun bidî. Berpirsîyarî keweno her kesî ser. Ez zî sahne de ana ziwan ser.”

Hunermenda tîyatroyî û sînemayî Fusun Demîrele bi wesîleya 25ê Teşrîna Peyêne Roja Têkoşînî ya Mîyanneteweyî yê Şîdetê Vera Cinîyan kayê bi nameyê ‘Dersê Evînî’ kay kerde û kayê xo de bale ante paştîdayîşê komelî yê seba cinîyan ser.

Fusun Demîrele qiseykerdişê xo de dîyar kerde ke aye sahne de nêseyyewbînanîya mabenê cinî û camêrdan ana ziwan ser û wina va: “Ez bale ancena vermuhakemekerdişî ser. Şîdetê hemverê cinîyan, domanan û heywanan zêde bîyo. Ganî ma çîyêk bikerî. Kayê ‘Dersê Evînî’ zî na babete de vejîya raşte. Herinda ke komel aver şêro her ke şono tepîya şono. Ganî ma vermuhakemekerdişan bişiknî. Na babetêka cidî ya.”

‘Berpirsîyarî keweno milê her kesî ser’

Demîrele dewamê qiseykerdişê xo de daye zanayene ke temaşekerdoxî xeylê eleqe nîşanê kayî danî û wina domnaye: “Ma sebebê zêdebîyayîşê şîdetî pîya cigêrayîş kenî. Ma nîşan danî ke ganî cinî û doman senî bêrî pawitene. Werikna lazimî bi na kaye çinbîyayêne. Labelê çi heyfo ke heta aşma teşrîna peyêne ya ewserrî 384 cinîyî ameyî qetilkerdene. Dayeyê fermî yê tecawizî çin î. Sewbîna yê îstismarî zî çin î. Se ra 95ê îstismarî nîno zanayene. Hûmarê dayeyanê prosesê AKPyî raştî zî bi xof î.”

‘Ganî ma pîya têkoşîn bikerî’

Demîrele tewr peynî daye zanayene ke ganî şîdetê hemverê cinî û domanan nêro meşrukerdene û ganî mexdur bêveng nêmanî. Demîrele bi nê vatişan qiseykerdişê xo peynî kerde û va: “Seba înan ganî têkoşîn bêro dayene. Seba ke qanûnê seba pawitişê cinî û domanan bêrî viaraştene, ganî dewlete rê zor bêro kerdene. Ganî ma pîya têkoşîn bikerî.” EDENE

Dikarî Biecibînî