Rojnameger Oruç qala çîyê ke ameyî sereyê ci kerd: Mi bi zorî sînor ra eştî

Rojnameger Azîz Oruço ke di rojî yo binê çiman de yo qala çîyê ke ameyî sereyê ci kerd û va: “Îstixbaratê Îranî qasê kîlometreyêk dûrê berê sînorî, dekewtişê mi yê Tirkîya mi ser de ferz kerdî. Ez her çiqas ke îtiraz bikera zî mi bi zorî têlan ra eştî sînorê Tirkîya. Ez ewja de tewrkê mergî ameya kerdene.”

Rojnameger Azîz Oruço ke di rojî yo binê çiman de yo qala çîyê ke ameyî sereyê ci kerd. Oruçî da zanayene ke îstixbaratê Îranî qasê kîlometreyêk dûrê berê sînorî, dekewtişê Tirkîya ci ser de ferz kerdî. Oruçî qiseykerdişê xo de va: “Ez her çiqas ke îtiraz bikera zî mi bi zorî têlan ra eştî sînorê Tirkîya. Ez ewja de tewrkê mergî ameya kerdene.”

Rojnameger Azîz Oruço ke qezaya Bazidî ya Agirî de nezaret de yo û Wezaretê Karanê Zereyî yê Tirkîya o sey ‘teorît’ mojna bi rayîrê avûkatanê xo qalê serebûtanê xo kerd. Orucî pare kerd ke 8ê kanûne de şaristanê Silêman yê Herêma Federa ya Kurdîstanî ra derbazê Îranî bi û uca ra zî derbazê sînorê Îranî û Ermenîstanî bi û Ermenîstan de ame destbendkerdene. Orucî vat:

“Polîsanê Ermenîstanî bi îdîaya ke pasaportê mi sexte yo ez destbend kerda. Zaf gefî ro mi wendî û şîdetê fîzîkî bi mi kerdî. Mi vat ez rojnameger a û wazena şora Ewropa. Oda de mi waştişê îltîca kerd. La pêro waştişê mi bi gefan ameyî redkerdene. Destê mi kelemçe kerd û ez erşawite Îran. Îstîxbaratê Îranî ez destbend kerda. Dima ez vejîyaye mehkeme. Mehkema Îranî cezaya pereyî ya qasê mîlyonû 800 hezar tumenî daye mi û bira sînorî ra teberkerdişî daye.”

“Rojêke îstîxbaratî ez berda sînorê Tirkîya û waşt ke ez sey qeçax derbazê Tirkîya biba. Mi îtîraz kerd la têlanê sînorî ser o ez eşte sînorê Tirkîya. Dima ez reyna derbazê sînorê Îranî bîye û înan newe ra ez eşte sînorê Tirkîya. Çend rey wina bi. Mi waşt ke ez bi hawayêkê fermî derbazê Tirkîya bika la îstîxbaratê Îranî nê qebul nêkerd. Wexto ke ez têlan ra derbaz bîya ez bîya birîndar. Uca de bi nê halî îstîxbarat ez verda ke bimira. Dima ez ameye Bazîd. Ermenîstan û Îranî waştişê min ê îltîca qebul nêkerd û nê sey suc hesibna. Polîtîkayê nê her di welatan vera huqûqê mîyanneteweyî yo. Cok ra ma do muracatê Mehkema Mîyanneteweyîye bikê.”

Orucî vizêr zî mesajêk erşawit û waştişê paştdayîşî kerd. WAN 

Dikarî Biecibînî