Amed: Nanê ma çinêbi, ma 8 rojî miqarne werd

Keyeyê Kiliçî seba ke nêeşkeno debarê xo bikero bi hetkarîya cîrananê xo werdê xo peyda kenê. Dadîye Layika Kiliç pare kerd ke seba ke pereyê înan çinêbi ke ard bigêrê 8 rojî miqarne werd

Layika Kiliç (65), kênaya ci Leyla Kiliç û tornê ci Bariş taxa Şeyh Şamîlî ya qezaya Baglarî ya Amedî de keyeyêk de ciwîyenê. Keye de têna odayêke esta. Dima ke dewa keyeyê Kiliçî ameye vêşnayene koçê Baglarî yê Amedî kerd. Dadîye Layika nêweşa cigeran û velgan a. Seba ke rewşa înan a ekonomîke baş nîya nêeşkena weşkerdişê xo dewam bikera. Keyeyê Kiliçî bi werdanê ke cîranê înan danê  îdare  kenê.

Layika Kiliç seba ke çîyêk çin o ke bivêşna û pê germin biba batanîyan, kincan û kartonan vêşnena û keye kena germin. Camêrdê Layika Kiliç 30 serrî verê cû merdbi. Layika Kiliç ard ziwan ke zaf rey feqîrîye ra waşt ke xo bikişa la seba ke nêwaşt kênaya xo têna biverda nêeşkaye. Kênaya ci Leyla Kiliç zî seba ke nêweş a nêeşkena bixebita.

Dadîye Layika Kiliç vat: “Ge ge cîranê mi sey hetkarîye pere danê mi. Ez nê pereyan seba faturayanê ceyranî, awe nimnena. Ma rê qasê 3 hezar TLyan cezaya ceyranê qeçaxî daye. Ez nika senî nê pereyî peyda bikera? Ez do şora û qeymeqam de qisey bikera û vaja şima çira ma rê hetkarîye nêkenê.Vaya her çîyî zêdîyena. Wextêk tewr pereyê ma çinêbi ke ez ard bigêra ma 8 rojan miqarne werd. Hînî pîzeyê kênaya mi tira dejîyayêne.” AMED