Qereyazî tehlukeyê vîrusî reyde rî bi rî ame veradayene

Hemşaredarê Qereyazîyî Burhanettîn Şahîno ke qeyûm tayînê herinda ci ame kerdene wina va: “Qeza mîyanê eşteyan de ya. Qeyûm Qereyazî tehlukeyê vîrusî reyde rî bi rî vera dayo.”

Hemşaredarê Şaredarîya Qereyazî yê Erziromî Burhanettîn Şahîno ke qeyûm tayînê herinda ci ame kerdene, dîyar kerd ke qeza de vera Vîrusê Korona (Covid-19) de tedbîrî nînê girewtene.

Qeymeqamê Qezaye Abdulganî Mago ke sey qeyûm tayînê Şaredarîya Qereyazî ame kerdene, senî ke ame kar ser sere de kesê ke wextê qeyûmî de bi hawayo bêûsul şaredarîye de ameybî cakerdene û badê weçînayîşê 31ê Adara 2019î de kar ra ameybî vetene tepîya kerd kar.

Şahînî dîyar kerd ke qeyûm seba şarê qezaye tu çîyêk nêkeno û wina va: “Şaredarî herinda ke kuçe û raşteyan dezenfekte bikera, tena dezgeyanê dewlete kena. Senî ke qeyûmê verên dêsê emnîyet, cendirme û edlîye viraşt û heqê mazotê înan qaseyê şaredarîye ra da, qeyûmê nika zî herinda ke kuçe, market û raşteyan dezenfekte bikero, tena awanîya emnîyet û zereyê bankayan dezenfekte keno.”

Hemşaredar Burhanettîn Şahîno ke qeyûm tayînê herinda ci ame kerdene, dîyar kerd ke qeza de vera Vîrusê Korona (Covid-19) de tedbîrî nînê girewtene û qiseykerdişê xo wina qedêna: “Heta nika seba şarî tu xebatêka dezenfektekerdişî nêameya kerdene. Maske û lepikî nêameyî vilakerdene. Qeza de tu dikanêk nêameyo dezenfektekerdene. Wesayîtê şaredarîye xerac ra nêvejîyenî. Çimkî xizmet çin o. Pereyê şarî seba tay kesan beno raşteyê îstîmlaqkerdişî. Qeza mîyanê eşteyan de ya. Qeyûm Qereyazî tehlukeyê vîrusî reyde rî bi rî vera dayo.” ERZIROM

Dikarî Biecibînî