Hebûn Kardaş binê ablûqa de ame definkerdene

Cenazaya gerîlayê HPGyî Hebûn Kardaşo ke operasyonê leşkerî yê Licê de şehîd bi, binê ablûqa de ameye definkerdene

Gerîlayê HPGyî Hebûn Kardaş 15ê nîsane de operasyonê leşkerî yê Licê de şehîd bi. Dima ke testê DNA yê Kardaşî eşkera bi keyeyê ci MEBYA-DER, wekîlan û îdarekaranê HDPyî yê Amedî reyde şi Nêweşxaneyê Cigêrayîşî û Perwerdeyî yê Gazî Yaşargîlî yê Amedî.

Polîsan vat ke heta ke komêka verê nêweşxaneyî vila nêba ê do cenaza nêdê. Dima mabênê wekîlanê HDPyî û polîsan de nîqaşêk qewimîya. Babîyê Hebûn Kardaşî pê vatişê ”Eke şima cenaza nêdê ez do xo bido adirî ver” nêrazîbîyayîşê xo mojna. Nêrazîbîyayîşê babîyî ra dima cenazaya Hebûn Kardaşî keyeyî rê ameye teslîmkerdene.

Polîsan cenaza saetêke rayîrî ra çarnaye û dormeyê goristanî pê wesayîtanê zirxînan girewt. Polîsan destûr nêda ke keyeyî ra ber çew tewrê merasîmê definî bibo. Cenaza hetê roniştoxanê taxe ra pê sloganê ”Ey şehîd gonîya to erd de nêmana”, ”Şehîdî nêmirenê” ameye pêşwazîkerdene. Leşkeran keyeyî ra vat ke heta ke sloganî nêqedîyê ê do nêverdê ke cenaza bêra definkerdene. Cenazaya Hebûn Kardaşî saete 23.30 de taxa Zorava ya Qezaya Sûrî ya Amedî de ameye definkerdene.

Roniştoxanê taxe merasîm de marşê ”çerxa şoreşê” û sloganî vatî. AMED 

Dikarî Biecibînî