‘Dewlete biwaza eşkena Gulîstane bivîna’

Gulîstan Dokuya ke 5ê çeleyî ra nata vindîbîyaye ra hema zî tu xeberêke nêameya girewtene. Komîsyonê Ma Seba Gulîstane Edalet Wazenî ra Ayşe Eser û Hîvda Selena OGKyî veng dayî ke ganî hedîse bêro roşnkerdene

Wendekara Perwerdeyê Domanan ê Unîversîteya Munzurî Gulîstan Dokuya (21) ke 5ê çeleyî ra nata vindîbîyaye ra tu xeberêke nêna girewtene. Vindîbîyayîşê Dokuye ra dima vejîya raşte ke Dokuye tewr peynî embazê xo Zaynal Abarokî reyde telefon de qisey kerda. Zaynal Abarok eslê xora kesêko Rûsî yo. Dima ra dadîya ci Dêrsim de polîsêk bi nameyê Engin Yucerî reyde zewicîyaya û no Yucerî ci kerdo sey lajê xo. Ame zanayene ke Abarok û Gulîstan Doku cafeyêko ke tede xebetîyayêne de yewbînan şinasnayî. Şewa 5ê çeleyî ra nata Dokuye ra xebere nîna girewtene. Heta nika derheqê keso şikin Zaînal Abarakovî ke pêroyê delîlan ci nîşan danî de tu tehqîqatêk nêdîyayo dest pêkerdene.

Komîsyonê Ma Seba Gulîstane Edalet Wazenî ra Ayşe Eser û Endama Koordînasyonê Merkezî yê Cinîyanê Ciwanan yê Azadan (OGK) Hîvda Selene derheqê babete de qisey kerdî û dayî zanayene ke ê wazenî bizanî ke kam peynîya hedîse de yo.

‘Delîl yenî sîyakerdene’

Ayşe Esmere qiseykerdişê xo de dîyar kerde ke serê şarê kurdî de polîtîkayê çinkerdişî yeno ramitene û wina dewam kerde: “Selahîyetdarî bi israr tena yew ca de cigêrayîşan kenî. Ma sey Komîsyonê Ma Seba Gulîstane Edalet Wazenî vanî ke ganî întîhat ser de nêro vindetene û cayanê bînan de zî cigêrayîş bêro kerdene. Asayîş û Walî timî cayêk de tena cigêrayîşan kenî. Ma tay xebatkar û ekîbê AFADî reyde kom bîyî. Ê vanî ke înan rê talîmat yeno û ê zî çarçeweya talîbatî de xebetîyenî. Ê vanî heta ke awbend nêro vengkerdene nêeşkenî cigêrayîş bikerî. Cinîyêka 21 serre senî wina vindî bena. 136 rojî yo ke ci ra xeberêk nêna girewtene. Tehqîqat hetê şûbeyo ke pîyê keso şokin Zaînalî ci de xebetîyeno ra yeno rayraberdene. Delîlî yenî sîyakerdene. Ma wazenî bizanî ke kam peynîya hedîseyî de yo. Ma wazenî bizanî ke çi yeno nimitene. Xeylê çîyê ke yenî nimitene estî. Dîmenê ke Zaînal ci de esto ameyî çinkerdene. Dîmeno ke 3-4 saetan dewam keno nîno dayene. Ma dîmenan wazenî ê vanî kamera nêxebetîyeno. Kesêk ewja ra derbaz nêbeno.”

‘Ma do bi paştîdayîşê cinîyan Gulîstane bivînî’

Esmere qiseykerdişê xo yê peyênan de ard ziwan ke ê destpêkê hedîseyî de çalakî û aktîvîteyanê cîya-cîyayan pê ardî û wina qedênaye: “Pandemî reyde xeylê xebatê ma asteng bîyî. Eke prosesêko normal reyna destpêbikero, ma do reyna xebatanê xo bikerî. Ma do paştîdayîşê cinîyan Gulîstane bivînî.”

‘Ma do bibî vengê Gulîstane’

Hîvda Selena OGKyî zî qiseykerdişê xo de daye zanayene ke hedîseyê Şûle Çet û Gulîstan Dokuye manenî yewbînan û wina dewam kerde: “Dêrsim de vindîbîyayîşê Gulîstan Dokuye qet şik çin o ke polîtîkayê vindîkerdişî ra cîya nîyo. Gulîstane cinîyêka kurd bîye. Zihnîyetê serdest ê camêrdî kewto dewre. Ma sey Cinîyanê Ciwanan yê Azadan do timî abubetê Gulîstane bipersî. Tay grûbê dewlete do têkoşînê ma nêdî vindetene. Ma do bibî vengê Gulîstane û têkoşînê xo gird bikerî.” WAN

Dikarî Biecibînî