Çimeyanê Munzurî de qedexeyî

Rîyê Vîrusê Korona ra bire ameye dayene ke 29ê gulane ra heta 1ê teşrîna verêne Çimeyanê Munzurî yê qezaya Pulurî yê Dêrsimî de pêro aktîvîteyî do qedexe bibê

Seba prosesê Vîrusê Korona Tirkîya û Vakurê Kurdîstanî de gamê normalîzebîyayîşî ameybî eşkerakerdene. Goreyê naye cayê sey îbadetxane, seyran û qewexaneyan bêrê akerdene.

Hetê bînî ra Heyetê Weşîye yê qezaya Pulurî yê Dêrsimî 29ê gulane de Çimeyanê Munzurî de tay qedexeyî îlan kerdî. Heyetî îfade kerd ke mabênê tarîxanê 29ê gulane û 1ê teşrîna verêne de Çimeyanê Munzurî de seyran, tavistişê mangalî, şimitişê alkolî, ronayîşê standan, rotişê dîyarîyan, asnawekerdiş, roniştişo komkî û gêrayîş ameyî qedexekerdene.

Hemwelatîyî do bieşkê hetê çimeyan de qurbanan sere bibirnê û vila bikerê la pewtişê înan qedexe yo.

Her serre hamnanan de elewîyî Çimeyanê Munzurî zîyaret kenê ke seba nînan fîraz ê û tede heywanan kenê qurban, îbadetê xo kenê. DÊRSIM  

Dikarî Biecibînî