Hêrişê vera Duzgun Babayî Meclîs de yo

Qezaya Qisle ya Dêrsimî de kerrayanê Jîyargeyê Duzgun Babayî ser o nuşteyê nîjadperestî ameybî nuştene û sembolê faşîstan ameybî xêzkerdene. Parlementerê HDPyî yê Dêrsimî Onluyî babete berde rojdemê Meclîsî

Qezaya Qisle ya Dêrsimî de kerrayanê Jîyargeyê Duzgun Babayî ser o nuşteyê nîjadperestî ameybî nuştene û sembolê faşîstan ameybî xêzkerdene. Parlementerê Partîya Demokratîke ya Şaran (HDP) yê Dêrsimî alîcan Onluyî derheqê babete de vernîyazêkê persî pêşkêşê Meclîsî kerd.

Onluyî waşt ke Wezîrê Karanê Zereyî Suleyman Soylu cewab bido vernîyaz û vist vîrî ke hêriş serrgêra Qirkerdişê Sêwasî de 2ê temmuze de ame kerdene. Onluyî vat: ”Tirkîya de bi hawayêkê sîstematîkî keyeyê elewîyan ameyî nîşankerdene, vera îbadetxaneyanê elewîyan hêrişî ameyî kerdene. Kesê ke no hêriş kerd ganî cade bêrê hukmkerdene.”

Onluyî vernîyazê xo de nê persî persayî:

-Derheqê hêrişî de tehqîqat dîyayo destpêkerdene?

-Roja hêrişî de domeyê Jîyargeyê Duzgun Babayî de wesayîtê bi plakaya 58î ameyo dîyene?

-Armancê nê hêrişo ke serrgêra Qirkerdişê Sêwasî de ame kerdene çita yo?

-Wextê wezaretîya şima de vera bawerîya elewîyan çend hêrişî ameyî kerdene? Derheqê nê hêrişan de çend tehqîqatî dîyayê destpêkerdene û qedînayene?

-Nê wextî de çend hêrişkerî ameyê destbendkerdene? ANQARA 

Dikarî Biecibînî