Walî waya Dokuye rê va: Şar û çapemenî rê qisey mekerê, bêveng bibêne

Waya Gulîstan Doku Aygul Dokuye dîyar kerde ke Walîyê verên Tuncay Sonel înan rê vato “Şar û çapemenî rê qisey mekerê, bêveng bibêne”  û wina vat: “Dozgero ke ma ci reyde pêvînayîş pê ard va ‘Gulîstane se ra 99 awbend de ya’ la reyna zî xebatê cigêrayîşî dîya vindetene

Wendekara Unîversîteya Munzurî Gulîstan Dokuya 21 serrî 5ê çeleyî ra nata vindîbîyaye ya. Netîceya xebetanê cigêrayîşî Gulîstane ra rêçêk nêame dîyene û tehqîqatê serdozgerîye zî aver nêşino. Seba ke babîyê gumandarê yewînî Zainal Abarakovî polîs o serebût sey ‘xokiştişî’ yeno mojnayene. Roja qewimîyayîşê hedîseyî ra nata keyeyê Gulîstane qezaya Erxanî ya Amedî ra şî pirdê Dînarî ke Gulîstane tewr peyêne uca de ameya vînayene û hema zî paweyê xebera kênaya xo yo. Seba ke vindîbîyayîşê Dokuye de îhtîmalê ‘xokiştişî’ sero yeno vindetene mewkîyê Pirê Sari Saltuk Viyadugu yê serê Gola Awbendê Uzunçayirî de xebatê cigêrayîşê ameyêne kerdene.

Bi fermanê Wezîrîya Karê Zerre xebata cigêrayîşê Dokuye ame vindetene. Her çend ke rojanê peyênan de malumatê ke hedîseyî bidî bedilnayene bivejîyî raşte zî dosya de tu averşîyayîşêk çin o. Waya Gulîstan Doku Aygul Dokuye reaksîyon nîşanê nizdîbîyayîşê selahîyetdaran daye.

Çirê xebatê cigêrayîşê aye dîyenî vindetene?

Aygul Dokuye qiseykerdişê xo de dîyar kerde ke badê ke Walî Tuncel Soner ancîyayo merkez xebatê cigêrayîşê Gulîstane dîyayî vindetene û wina va: “Mi vizêr Serdozgerîya Dêrsimî reyde pêvînayîş pê ard. Mi rê va ‘Gulîstane se ra 99 awbend de ya’. Madem waya mi awben de ya çirê xebatê cigêrayîşê aye dîyenî vindetene? Ma do senî waya xo binê awe de verdî û şorî keye.”

Xeylê persê ma bê cewab ameyî veradayene

Dokuye wina dewam kerde: “Xeylê persê ma bê cewab ameyî veradayene. Roja verên ra ez vana waya mi xo nêkişta, ameya kiştene. La dozger û selahîyetdarê asayîşî vanî ke dayeyê verê destê înan, înan anceno awe ver. Ez her roje şona serê pirdî. Eke wina bo zî wa kênaya ma awe ra bivejnî û bidî ma. Walîyê verên Sonel sozê vînayîşê waya mi da mi. Mudirê ÎŞKURî Ozdemîr Aktaş seba ke ma rayapêroyî awan nêkerî ma îqaz kerd. Aktaş mi rê va Şar û çapemenî rê qisey mekerê, bêveng bibêne. Kesêk rê qisey mekerê. Wa têkilîya to bi çapemenî rê çinî ba. Bawerîya xo tena bi Tuncel Sonerî rê bîyare. O do Gulîstane bido to.’  Ma waşt şêrî Anqara la destûr nêdayî. Ma bawerî xo bi înan ard. La wexto ke ma ewnîyenî rewşa xo ya ewro, ma vînenî ke ma heta ewro ameyî meşgulkerdene.”

Gelo Gulîstane aye şewe çi musa?

Dokuye qiseykerdişê xo wina peynî kerde: “Walîyê newe Mehmet Alî Ozkan do dosyayê Gulîstane newe ra bigîro dest. Heta ke ma kênaya xo nêvînî, ma tîya ra nêşonî. Ma qebul nêkenî ke kênaya ma xo kişta. Eke çîyêk çin bo çirê kênaya ma xo bikişa? Verê ke Gulîstane vindî biba çirê Engîn Yucel piro dano Zaînal Abarakov û cinîya xo ro. Çîyo ke aye şewe qewimîya çi bî? Gelo Gulîstane aye şewe çi musa? Çirê çîyê ke aye şewe qewimîyayî nînê roşnkerdene? Yanî xeylê kesî estî ke ganî bêrî muhakemekerdene.”

Ganî herkes bibo vengê Gulîstane

Dokuye tewr peynî veng daye pêroyê cinîyan ke wa destûr nêro dayene ke Gulîstane bi no hawa vindî bimana û ganî herkes bibo vengê Gulîstane. DÊRSIM

Dikarî Biecibînî