Grevê vêşanîye

Rojevê ma de fina grevê vêşanîye estê. Welatî de û teberê welatî de grevê vêşanîye yenê kerdene. Bi taybet wexto ke Leyla Guvene dest bi grevê vêşanîye gerd, game bi game grev vila bî.

Nika êyê ke zîndanî de yê zîndanî de, êyê ke teber de yê teber de, grevê vêşanî kenê. Çalakîkerê grevê vêşanî her ke şino bale ancenê xo ser. Seba ke babete azadîya Rayberî ya heme welatperwer û demokratî bi baldarî grevê vêşanî ra ewnenê. Labelê çîyo ke sosreto o yo ke dewlete no het ra qet nênana xo.

Verê ke ez na meqale binusa, mi gûûgilî de tay cigêrayîşî kerdî. Babete kan a. No hezaran serran o ke na çalakîye yena kerdene. Hîndîstan, Roma de verê hezaran serran çalakîyî ameyê kerdene. Nê 2 sey serranê peyênan de zî Îrlanda, Hîndîstan de çalakî virazîyayê.

Bi taybet Mahatma Gandî mabeynê serranê 1913-1948 de rîwalê sebebanê cîya ra cîya 17 rey kewto grevê vêşanî.

Serranê 70 ra dima Tirkîya de zî têpeyde çalakî yenê kerdene. Şarê kurdî çalakiyê greva vêşanî û yê mergî têkoşînê PKK ya şinasna. Yewine şehîd zîndanê Amedî de serra 1981 de yê bîn zî serra 1982 de yenê dayene. Sere de M. Xeyrî Durmuş, Kemal Pîr şehîd kewenê. Serranê peyra zî şehîdî estê.

Çalakîya greva vêşanî yan zî çalakîya greva mergî vera dişmenan de yenê kerdene. Çunke her çiqas di hetî dişmenê yewbînî bê zî ganî mabeyn de exlaq û qanûn est bo. Wexto ke nêheqî yena kerdene grewteyê sîyasî çalakî kenê.

Çunke wazenê heqanê xo dest fînê û heqanê xo ya bicuyê. Tîya de ganî kes naye jî vajo: kesê ke grevê vêşanî yan zî mergî kenê; nê her di çalakîyan ra teber şensê înan ê çalakî kerdişî çin o coka nê her di çalakîyan kenê. Kesê teber de yê xora wayîrê îmkanê têkoşîn                 kerdişî yê.

Qandê cû hewce nêkeno kesê teber de yê çalakîya vêşanî yan mergî bikerê. Labelê nê serranê peyênan de têkoşînê kurdî de yeno dîyene; heke zereyê zîndanî de çalakîyê grevê vêşanî yan mergî est bê teber de zî bi çalakîyanê greva vêşanî yan mergî paştî yena dayene.

Naye bêgûman rast a û ganî merdim tepişteyanê zere de yê xo vîr ra mekero û paştî bido ci.

Rayberê merdimîye, Rayber Ocelan ke sey Roj o û merdimîye roşn keno, no 20 serrîyo girewte yo. Şarê kurdî mîyan de qijan ra heta pîlan bi desan kesan adir verda canê xo û xo kerdî fedayê Ocelanî. Rayber Ocelanî ser o tecrîtêko giran esto.

Naye ra teber no wextêk o şarê kurdî Ocelanî ra xebere nêgirewt a. Qandê cû şarî mîyan de hêrs bîyo zêde. Na rewşe rê tehamûl nêmendo. Her kes wazeno Rayberîye şert û şûrtanê azad de bivîno.

Dişmen zî yew nîyo di nîyê. Xora komplo mîyandewletî bî û Rayberîye destbend kerdî û ardî Tirkîya. Rayberîye Tirkîya de zî bin kontrolê gelek dewletan de yo. Sîstemêko winî Girawa Îmralî de ameya ronayene ke mîsalê ci dinya de û tarîx de tay o.

Qandê cû kurdî nika zere û teber de, welat û teberê welatî de grevê vêşanî virazenê. Oyo destê ma ra bêro no yo ke ganî her welatperper, demokrat kotî de beno wa bibo heta ma netîceyêk bigîrê ganî ma têkoşînê xo timî berz bikerê.

Dikarî Biecibînî