Çalakîya wijdanî vila bena!

Wijdan û exlaq seba famkerdişê merdimayîye çiyê en muhîm yan zî esasê en pîl ê. Labelê roja ma ya ewro de modernîteya kapîtalîst kena ke wijdan û exlaqî mîyanê komelan ra dima ra şexsan ra bigîra û dinyayêka bêwijdan û bêexlaq birona.

Vera na kerdena modernîteya kapîtalîst de mucadeleyêko pîl esto û şarî dorê nê mucadeleyî de bîyî yew. No mucadele her çiqas pêrûnê dinya de bibo zî esasê xo de rojhelato mîyanên de dest pêkerd. Kurdî bi rayverîya birêz Abdullah Ocalanî; nika şaran ra rayverîye kenî û vera modernîteya kapîtalîst de komelo biwijdan û biexlaq pawenî.

Birêz Abdullah Ocalanî binê esareto ke hetê dewleta Tirke û hêzanê bînan rê ci rê ameyo ferzkerdene de, bi fikranê xo vernîya şarê kurdî û şaranê bînan akerd. Birêz Ocalanî bi paradîgmaya newî ke şertanê Îmraliyî de aver berd û binê tecrîdêko giran de şaran ra pêşkêş kerd; hetê zaf hetan ra ameye qebûlkerdene.

Ewnîyayîşê birêz Ocalanî bi no qeyde vera modernîteya kapîtalîst de bi hêzo yewin û heme kesan dorûverê xo de ard pêser. Kurdî bi perspektîfo modernîteya demokratîk ke birêz Ocalanî vera kapîtalîzmî de rona dest bi mucadeleyêko newe kerdî; no mucadele sere de dewleta Tirke, gelek hêzanê bînan tersna û tecrîdê Îmraliyî bi no qeyde bi xorîn…

Demêko derg o ke tecrîdê Îmraliyî dewam keno. Her çiqas keye û avukatî seba pêvînayîşî muracatan kenî zî nêeşkenî şêrî Îmrali û her wext hetê îdarekaranê dewlete ra muracatê înan yenî redkerdene. Na rewşe prosesê çareserî ra dima dest pêkerd û hema zî dewam kena.

Îdarekarê dewlete bi no qeyde îradeyê pêrûnê şarê kurdî gêno binê linganê xo. Bi milyonan kurdî birêz Ocalanî sey îradeyê xo vînenî û sey rayver xo rê qebûl kerdî. Vera no îrade de dewlete tu game nêerzena û hurmet nîşanê îradeyê kurdan nêdana. Kerdena dewlete xura teberê hiqûqî de ya. Hem tecrîd hem zî astengkerdişê keye û avukatan tu hiqûqê dewletan de ca nêgênê.

Ewro seba ke na bêhiqûqî orte ra bêra wedarnayîş çalakîyî estî. Demêko derg o ke nê çalakîyî dewam kenî. Labelê çalakîya en peyêne ya ke hema zî dewam kena û vengê aye resaya zaf cayanê dinya; çalakîya grevê vêşanî ya Leyla Guvene ya. Hemsereka Kongreya Komelê Demokratîk û Parlamentera HDPyî ya Colemêrgî Leyla Guvene 33 rojî yo seba ke tecrîd bêro wedarnayene çalakîya grevê vêşanî de ya.

Guvene reyde hem teber hem zî zindanan de gelek kesî kewtî grevê vêşanî û çalakîya Guvene pêrûnê dinya de veng dana. Kurdî ewnîyayîşê xo yê wijdanî û exlaqî yê ke Rayverê xo birêz Abdullah Ocalanî ra girewtî; seba Rayverê xo bi o ewnîyayîş çalakîyan de yî. Çalakîya wijdanî û exlaqî nika gelek cayan ra vila bena û kurdî şexsê Leyla Guvene de kenî ke her cayan de beşdarê nê çalakîyan bibî û tecrîdê Îmraliyî perçe bikî.

Çunkî zanî ke heta ke berê Îmraliyî anêbî, înan rê azadî û pêrûnê Kurdistan û Tirkîye ra aşitî nêna. Aye ra wayîrvejîyayîşê nê çalakîyan seba heme kesan zaf muhîm o. Bi nêzdîbîyayîşê wijdanî û exlaqî do tecrîd wedarîyo û hîşyarîyêka pîle bikewa mîyanê şarê kurdî.

Dikarî Biecibînî