Sebebê Nê Teşxelyan Dagirker ê

Bi hezaran serran o ke Şarê Kurdî na axa xo ya qedîme ser de ciwîyêno û wazeno ciwîyayîşê xo aye ser de bi azadî bidomno. Çimê şarê Kurdî ti wextêke axa yewî de nêbîyo û ti wextêke welatê yewî dagir nêkerdo la, çi heyf ke koçeranê Asyaya Mîyanîne ra bigî heta kolonyalîstanê Ewropa û Emerîka înan ra zî bigî heta talankarê ke cîranê Kurdan ê heme milet û dewletanê dinya bi nîyetê xo yo xerab çim kerd welatê Kurdan, welatê înan perçe perçe kerd, heme dewlemendîya erdnîgarîya înan xo rê xebetna û her tim hewl danê ke estbîyayê fizîkî yê şarê Kurdî zî raste ra wedarê.

Sey ke ma zanê bindestverdayîşê şarê Kurdî û dagîrkerdişê welatê înan de dest zehf milet û dewletan esta la, ma eşkenê vacê ke dimayo ke Kurdan hetkarî da cengizxan û ogizxanan û ey welatê xo de hewênayî ra tepya bindestkerdişê înan o tewr zêde û qeîm ke hetê dagirkeran ra heta rocê ma eyroyî domêno dest pê kerd. Helbet dimayo ke Kurdan war û welatê xo de ca da înan û dî ke nîyetê meymananê înan xerab o dest bi têkoşîn û serrewedartişan kerd û serrewedartişê înan zî heta rocê ma yê eyroyî domêno. Tenê ma banîrê rewşê Rocawanî ra bes o ke ma nîyetê xerabî yê nê teber ra amayayan bivînê. Dinya destkewtişanê Kurdanê Rocawanî rê bî şahid ke senîn bê şerr û vinîkerdişan îradeyê axa zo viste destê xo.

La ey nê rê zî bî şahid ke senîn hetê dagirkeran ra çeteyê DAÎŞ’î ameyî birayvistişî, senîn hetkarî înan rê amî dayîşî Kurdanê Rocawanî ser de bi hovî ameyî şirawtişî. Sere de Tirkiye çend dewletan paştî da DAÎŞ û ey Kurdan ser de şirawitî û Kurdan bi xoverdayîşêke tarîxî nê çeteyê înan têk berdî. Dimayê nê destkewtişê şarê Kurdî pergala dagirkere ke hetê AKP’î ra yena rayra berdişî tehemul nêkerd û kewt mîyanê geyrayîşan ke nê destkewtişanê şarê Kurdî ancî înan ra tepya bigîro û bi destkedayîşê Emerîka, Rûsya û çend welatê bînan, bi qiwetêke pîl ê hewayî û bejahî şaristanêke qic ê sey Efrînî dagir kerd. Verê çimanê heme dewletanê ke vanê ma demokrat ê û heqanê bingehînan ê heme şaranê dinya nas kenê û bi qanûn û peymananê xo înan pawenê de şaristanêke şarê Kurdî Rocawan de hetê Tirkiye ra ame dagirkerdişî la ey heme welatan bi bêvengîya xo paştî da dagirkerîya na pergale.

Ma baş zanê eyro roc sebebê teşxeleyanê ke Kurdan ser de virazênê û sebebê teşxeleyo ke Sûrîye û Rocawan de domêno heme Emerîka, Rûsya, Îran, Ewropa û Tirkiye bi xo yê. Xo ra awankarê DAÎŞ’î bi xo zî ey bi xo yê. Nê heme dewletî xoserîya Kurdan ra tersenê û nêwazenê ey biarsê xoserîya xo. Ey zanê xoserîya Kurdan xoserîya heme şaranê Rochilata Mîyanîn a. Roco ke nê heme welatî pertalanê xo bigîrê û Sûrîye û Rocawan ra vecîyê û destê xo Rochilatî ser ra wedarê hema pey înan ra go aramî û aştî zî bêro axa şaranê na erdnîgarîya Rochilata Mîyanîne ser. Ma zanê ke hetê eynî qiwetan ra Rayberê şarê Kurdî zî bi komployêke teslîmê Tirkiye amebi kerdişî û no tecrîdo ke bi serran o domêno zî bi hetkarîya înan domêno.

Eyro şarê ma ancî hetêke grevê veyşanî ke semedê wedartişê tecrîdî kewtê ci domnenê, hetêke zî xebatê weçînayîşî ke semedê qewernayîşê xespkaranê ke ked û îradeyê înan ser de dayo ro domnenê. Sey ke yeno zanayîşî ma bi xebetnayîşê heqê xo yê weçînayîşî ke goreyê Qanûnanê na pergale ra ameyo rûnayîşî îradeyê xo moştib ra la hetê na pergala dagirkere ra îradeyê ma zî ameyo xespkerdişî.

Dikarî Biecibînî