Eyro rocan ra Roboskî ya

Eyro rocan ra rocêka tarî ya, rocêka bi bêbextî, mixenetî û zilmî ra degrotî ya… Eyro rocan ra Roboskî ya ke tarîtîya aye de vewrî bi gune tûtan û ciwanikanê dayanê xo bîya sûr e. Eyro rocan ra hewara dayanê Roboskî, dayanê Kurdan û heme şarê Kurdî ya. Eyro Sûrbîyayîşê vewra Roboskî zerre ma veyşnena, helnena û kizirnena!

Wexta serrnameyan tarîxa 28’ê Kanûna 2011’î moştêne ra çimê dayanê Roboskî rayîrê tûtanê înan de bi. Tût û ciwanê Kurdan ke sirf semedo ke şaristanêke xo yê bînî de dayîş û girotiş kerdibi û ageyrayne keyanê xo hetê dagirkeranê ke sînor mîyanberê herdi şaristananê înan de dabi ro ra bi top û guleyanê xo yê ke ejdîyanê asnîn ra înan ser de varrnayne ameyî qetilkerdişî. Çimê dayanê înan rayîrê înan de la ne ey risayî dayanê xo ne zî veng û qîrîne înan…

Roco ke nê dagirkeran kone dewlete xo axa Kurdan ser de daçiknaya heta rocê Roboskî, şarê Kurdî zehf rayan rast ro qetlîamanê înan ameyê. Qetlîamê 33 guleyan zî ke 28’ê Temûze 1943 de Qelqelîya Wanî de Kurdan ser de pêk ame nê qetlîaman ra hebêke yo ke hetê eynî pergala ra 33 canê Kurdan bê sûc û bê guna ameyî qetilkerdişî! 28’ê Temûza 1943 ra heta 28’ê Kanûna 2011’ine hetê desthilatan ra teberê sîlehan de çi bedelnayîş virazya? Bi 33 guleyanê xo kiştişê Kurdan û bi 34 roketanê teyaran kiştişê Kurdan. Zihnîyetê na pergala ya hetê Kurdan ser her wext eynî yo; bi heme awayî kiştişê Kurdan. Serrî û se serrî bedelênê, zanistî û teknolojî bedelênê la zihnîyetê na pergala dagikere eynî maneno û zilmê înan ê Kurdan ser de zêdyeno.

Ti fekêke nêeşkeno êşê dayanê Roboskî bîyaro ziwan û ti qelemêke zî nêeşkena binûsna la semedê înan êşêke bîn zî goreyê sûcdaran ra têgeyrayîşê Hukmî yo. Semedo ke çend ewraqî nêkewtê dosya heqê serdayîşê ferdî Dadgeha Qanûnê Bingeyî de ame vinîkerdişî û Dadgeha Heqanê Merdiman a Ewropa (DHME) zî no sey sebebî moşt ra û pêvajo qedêna! Bi nê awayî Kurdî rayêke bîne bî şahid ke bi qasê dewletê dagirkeran dewletê Ewropa zî hiqûq û qanûnanê xo goreyê nehfanê xo ra fînenê dewre û goreyê xo ra zî dewre ra vecenê.

Winî eyseno ke na desthilatî wazena versûcanê qetlîamê Roboskî zî sey heme versûcanê qetlîamanê ke heta nika şarê Kurdî ser de pêk ardê bê ceza verdo û heta wexta firset bivîno sûcdaran xelat bikero. Û ancî mexsedê na desthilatî no yo ke qetlîamê newînan ke Kurdan ser de viraştê vîrê şarê Kurdî ra bero, înan het ra kerdişanê xo bikero rewşêke normal û her ke zerra aye waşt qetlîamanê xo înan ser de bidomno.

Hewt serrî yo ma benê şahid ke na pergale senîn hewl dana ke serê qetlîamê Roboskî bigîro û şarî vîr ra bero. Û winî eyseno ke her roc, hefte û aşmê ke şinê Roboskî ma vîr ra yena berdişî. Halbikaw ma zî xo rê soz dabi ke ‘eke ma nê qetlîamê Roboskî xo vîr ra bikerê wa qelbê ma ziwa bo’. La eyro rewşo ke ma tedeyê û awayo ke eyseno ma sozê xo ra dûrî konê. Lazim o ma bi hiqûqnasan û siyasetmedaranê xo ya heta her ferdêke şarê xo na doze ra fek verra nêdê û dima bigeyrê heta ke sûcdarî cezaya ke heq kenê bigîrê. Lazim o ma Robosk nêkerê xo vîr ra û nêdê vîrakerdişî. Ewro hewt serrîya Roboskî ya û çimê dayanê Roboskî hema zî nêameyê ziwakerdişî…

Dikarî Biecibînî