Her çi ra ver ‘yewî’!

Kerkûk, Efrîn û nika kamca? Goreyê Dewleta Tirke nika dore, dora rojhelatê awa Firatî ya. Dewleta Tirke ya îşgalker, bi serran o kena ke estbîyayîşê Kurdan ê Bakurê Sûrîye biqedîna. Labelê her tim raştê îradeyê Kurdan û dostanê înan yena. Kurdî destpêkerdişê şerê Sûrîye ra heta nika raştê gelek hêrişanê xidaran ameyî û vera hêrişan bi heme îmkananê xo, xo ver dayî. Xoverrodayîşê Kurdan kerd ke vengê înan bireso heme dinya û ê do bieşkî bi kamîya xo ya Kurdîtî heme cayanê dinya de behsê qewimyayîşanê Kurdistanî bikerî. Naye bitaybetî şerê Kobanê ra dima kewt pratik. Kurdî bi xoverrodayîşê xo yê pîroz vernîya serkewtişanê neweyan akerdî. Aye ra sere de Hêzê Koalîsyonî û Amerîka paşta Kurdan de vindertî û mucadeleyê Kurdan o vera DAIŞî ra wayîrtîye kerdî. Her çendêk naye bêra cuyayene zî Kurdî hêrişan ra nêxelesyayî û heta heta heme qezencê Kurdan bîyê hedefê Dewleta Tirke û sey ê.

Başûrê Kurdistanî de Kerkûk bi hedef û ame îşgalkerdene; Rojawanê Kurdistanî de zî Efrîn ame îşgalkerdene. Nê wirdî cayî hema hema eynî deman de raştê eynî tewir hêrişan ameyî. Bitaybetî Efrîn raştê hêrişanê xidaran ame. Teyyare, tanq, top û her tewir sîlehê giranî nê hêrişan de ameyî şuxulnayene û sîvîlî raştê her tewir çiyan ameyî. Hedefê yewin o hêrişan qedînayîşê estbîyayîşê Kurdan bi la o hedef bi îradeyê Kurdan ame şikitiş û vera heme hêrişan xoverrodayîşêko pîl ame nîşandayene. Helbet Efrîn kewt destê Dewleta Tirke labelê vindertişê Kurdan vernîya gelek çiyan akerd û kerdenê Dewleta Tirke yê Efrînî yew bi yew vejîyayî orte. Dewleta Tirke wazena hêna hêriş bikera. Hêrişo ke fikiryena zî ê verênan ra zaf cîya yo. Hedefê hêrişo ke xeyalê ci beno; heme Rojawanê Kurdistanî yo. Minbicî ra heta Amûdê… Heme cayê ke Kurdî bi şaranê bînan sîstemê xo nayê ro nika hedefê Dewleta Tirke û hemparanê aye de yo. Çira hempar zî? Çunkî kerdenê hêzê mîyanneteweyî majnenî ma ke estbîyayîşê Kurdan qet û qet xemê înan de nîyo û hêrişî bibî nêbî, cîyayîyêk çin a…

Beyanatê îdarekaranê Dewleta Tirke ra dima Amerîka û gelek hêzê bînî, derheqê tehdîdê hêrişan de beyanatan dayî û vatê ke do destûr nêdî tu hêrişan. La beyanatê Amerîka zaf dewam nêkerd û Trumpî bi beyanatêk eşkera kerd ke ê do leşkeranê xo Sûrîye ra peyser biancî. No beyanat û peyserşîyayîşê leşkeran tay bo zî goreyê waştişê Dewleta Tirke bî. Tena Dewleta Tirke ney goreyê waştişê Îran û Rûsya zî bi. Hetêk de tehdîdê Dewleta Tirke dewam kenî heto bîn de zî peyserşîyayîşê leşkeranê Amerîka esto. Nê wirdî çiyî kenî ke Kurdî xo bierzî mîyanê nakokîyan û hêzê xo yê esasî ra dûrî bikewî. Labelê Kurdî ne roja ewil ne zî nika, tu wext paşta xo nêdayî hêzanê pîlan. Helbet siyaset bê nê hêzan nêbeno la eke mesele estbîyayîş û çinbîyayîş bo tu hêz nêeşkeno îradeyê Kurdan bişikno û bigîro binê kontrolê xo. Labelê seba ke nê tehdîdî û no tenaverdayîş biqedîyê, lazim o ke Kurdî her çi ra ver yewîye ser o nîqaş bikerî. Bi serran o ke yewîye ser o gamî yenî eştene labelê pratîk de tu tesîrê gaman yan zî waştişan çin ê. Gere Kurdî paşta xo bidê yewbînî û yewîya xo ronî, heta ke yewî çin bo tehdîd, hêriş, talan, qetlîam û gelek çiyê bînî do her tim bibê belayê Kurdan. Her çi ra ver yewî!

Dikarî Biecibînî