2019 do çi bîyara!

Serrêka bîne zî ma peyeyê xo de verdenê. Serra ke ma peyeyê xo de verda, raşta ci 2016 û 2017î ra cîya ney, heta heta tay çiyan de ê serran ra xirabîr bî. Çunkî 2018, bi xorînbîyayîşê faşîzmî hêna zêde giran vîyart û çiyê ke mîyanê na serre de qewimyayê, dewamê kerdenanê 2016 – 2017î bî û 2018 seba ê kerdenanê lêşinan ê pergale bi serra meşrubîyayîşî. Pergala ke bi serran o îqtîdar waştêne birano, na serre de ameye ronayîş û her çi goreyê waştişê îqtîdarî rayîrî ra şono.

Sere de dişmentîya vera Kurdan dima ra zilm û tedayê ke heme şaran ra benî; na serre de rojeve de bîyî. 2018 bi hêrişo vera Efrînî dest pêkerd û hêna bi hêrişo vera Rojawanî yan zî Bakurê Sûrîye qedîna. Raşta ci îqtîdar her wextan ra hêna zêde 2018î de dişmentîya Kurdan kerd xorîn û her hetan ra hêrişê Kurdan kerd. Seke ma va, hêrişo ewilin o 2018 Efrîn bi, Efrîn vera hêrişanê înan de xo ver da û seba ke nêzdîyê milyonî merdimî nêbî qurbanî, hêzê Kurdî û dostê înan xo peyser antî û Dewleta Tirke bi no qeyde, Efrîn de kontrol girewt xo dest. Efrîn cayo yewin nêbi; verê Efrînî, Kerkûk şibi û dima ra Efrîn de wina yew çi qewimya. Her di cayî zî seba serdestan prova bî û waştê ke qezencê Kurdan ê bînan zî destê înan ra bigîrî labelê Kurdî fek xoverrodayîşê xo ra veranêdayî. Hetêk de vera hêrişan de xo pawitî heto bîn de zî pergala xo ya demokatîk awan kerdî. Rojawanê Kurdistanî yanî Bakurê Sûrîye de rewşe wina bî û na rewşe nika 2019î de bedelîna. Dewleta Tirke kena ke bikewa ucayî û heme qezencê Kurdan orte ra hewana. Labelê ne hemsencîya nabênê Kurdan û dewletanê mîyanneteweyîyan, ne zî hemsencîya nabênê Dewleta Tirke û dewletanê mîyanneteweyîyan yewbînan nêtepişenî. Kurdî bi qeydeyêk kenê ke vernîya hêrişan bigîrî la her çi ra ver xo seba xoverrodayîşêko pîl kenî hedre; la heme hêzê Kurdan naye baş zanî ke bê yewî tu xoverrodayîş nêeşkeno vernîya nê hêrişan bigîro… Yanî mesele se bena wa biba nêeşkena bikewa vernîya yewî; 2019 de her çi ra ver Kurdan ra yewîyêk lazim a…

2018 de meseleya en muhîm a ke sebebê xorînbîyayîşê krîzî yo; tecrîd bî. Tecrîdo ke Rayverê Şarê Kurd Abdullah Ocalanî ser de yo, na serre de zî dewam kerd û berê Îmrali nêame akerdene. Seba wedarnayîşê tecrîdî tu wext çalakî nêvindertî û estbîyayîşê OHALî ver o zî Kurdî û dostê înan kerdê ke berê Îmrali abibo… Seba wedarnayîşê tecrîdî hemleya en girde zî peynîya serra 2018î de şexsê Leyla Guvene de dîya destpêkerdene. Leyla Guvene 50 rojan ra zêde yo ke grevê vêşanî de ya û gelek hepsîyê sîyasî yê bînî zî aye teqîp kenî. Waştişê hepsîyan o yo ke; tecrîd bêro wedarnayene û Rayverê Şarê Kurd Birêz Ocalanî reyde pêvînayîşî bêrê destpêkerdene. Bi na çalakîya girde û bi no îradeyo pîl ma kewenî 2019. 2019î ra Kurdî zaf çi pawenî; sere de wedarnayîşê tecrîdî dima ra vindertişê hêrişê vera Rojawanî û vindertişê şerê pêroyîn. Bi nê waştişan Kurdî kewenî 2019, labelê se beno wa bibo do Kurdî heme îhtîmalan de xoverrodayîşê xo bidomnî…

Dikarî Biecibînî