Amerîka şî ha!

Şerê Cîhanê yê hîrêyine de hem tesadûfî zaf estê hem zî surprîzî. Nê rojanê peyênan de wexto ke serekê DYA vat: ˝êdî çi sebeb nêmendo ke hêzê ma Suriye de bimanê, DAÎŞ ame qedênayene˝ gelek dewlete, rêxistin û şexsîyetî şok ravêrna. Labelê seba ma kurdan bi taybet seba Tevgera Azadîye çîyêko ecêb çin bî. Çunke kurdê bi fam tarîxê xo baş zanê û goreyê nê zanayîşî hereket kenê.

Bala xo biderê; şerê Cîhanî yê yewine de şaro kurdî sere wedard, dişmen welatê xo ra qewirna la çîyêk dest nevist. Şerê Cîhanî yê diyine de kurdan fina şer kerd la çi bi dest kewt? Hema vaje qet. Komara Mahabat ame ronayene la wexto ke Rusya piştgirîya xo birna, badê yewendes mengan rijîya. Rewşa şerê Cîhanî yê hîreyine de rewşa wina ya? Bêgûman ney?

Rayber Abdullah Ocelanî Serra 1973 de resmî dest bi têkoşîne kerdo. Eke ma a serre ra bigîrê dest no çewres û panc serrî yo têkoşîn bêmabên devam keno. Eke ma têkoşînî bi ronayîşê PKK ra bigîrê dest no çewres serrî yo têkoşînêko bi xurt yeno kerdene. Badê nê têkoşînî de nê rojan de zî yeno dîyene ke êdî kurdî bîyê bihêz. Hêzanê Cîhanî sey verê nêşenê goreyê xo reng bidê kurdan û kurdan ser o bireyê goreyê keyfê xo bide. Qandî cû her kurdê welatperwer ganî roje de qet mebo reyêk şukur PKK rê bikero. PKKê çarenusa seyan serran vurna û kurdo azad arde were.

Rayber Ocelanî bi fikranê xo yê raver PKK rona. Wextêko hewce de strateji vurna û vîrdozî de newekerdişê muhîmî viraştî. Badê cû PKK bîye partîyêka ke qet bin nêkewena. Ewro Rojawanê Kurdîstanî de zî no fikir bi kadro û gerîlayanê pêtî şaranê herême rê azadîye ano. Her ke şaran rê azadîye ano, azadîya kurdî zî tesîl keno. Qandê cû şukur ke PKK esta. Eke nêbîyêne sey şerranê verê yê Cîhanî bîyêne û na fin kurdî orte ra ameyêne wedarnayene.

Babetêko bîn zî esto: nê rewşanê winasî de xayinî qet nêvindertê. Rayberê Qop û Kasim çi bi serewedaritişan kerd her kes zaneno. Ewro zî xayînî estê. Xayînî zaf ê zî. Winî zaf ê nêyenê amortene. Ganî şaro kurd vera nê xayinan de pêt vindero, nêke sey verê eşkenê nê serewedaritişî zî bin fînê. Nê xayinan ra yê tewr zaf yenê zanayene xayinê ke xo rê vanê ENKS yê. Bi tehdîtkerdişê Tirkîya ra nê xayinan zî lez dayo xo. Verê mîkrofonê kanalanê dewleta tirke de winî qisey kenê merdim şaş maneno. Sey faşîstê tirkan qisey kenê û xo zî sey welatperwer nîşan danê û wayîr Rojawanê Kurdîstanî vejîyenê. Seba dolar û menfaatê keyeyî wina kenê. Wera nînan de ayabîyayîş lazim o.

Çend qisayî zî roşnvîran ser o. Çi heyf! Roşnvîrê ma yê korfam estê. Xora korfamî nêweşîyêka bêderman a. Nê roşnvîrê korfam hîna zî rexneyan anê PKK ser o. PKK no çewres û panc serrî yo seba kurdan fedakarîye kena û gan û gonî dana. Her roje serkewtenanê newîyan şaro kurdî tacîdar kena. Wexto ke wina kena bi vîrdozî û sîyasetê xo ya kena. Tay roşnvîrî çirê hîna zî netewperestî ferz kenê ke? Netewperestî ma dana vindîkerdiş. Dewletperestî ma dana vindîkerdiş. Çirê ma rêbazanê ke ma danê vindîkerdiş de Israr bikerê ke?

Serkewtiş û ameyoxêko azad avankerdiş vîrdozîya PKK ra ravêrena. Qandê cû her keso/a samîmî û dirust o/a ganî cehd bikerê û vîrdozîya PKK`ê ra fam bikero ke serkewtişê şaro kurdî de keda ci estbo.

Dikarî Biecibînî