Wijdan kamca yo?

Ewro 61 rojî yo ke Leyla Guvene xo ver dana. Leyla Guvene seba tecrîdo ke Rayverê Şarê Kurd Abdullah Ocalanî ser de yo bêro wedartene, kewt grevê vêşanî. Waştişê Leyla Guvene waştişê heme şarê Kurdî yo û na çalakî eynî wextî de seba pawitişê rumetê şarê Kurdî yo. Kam vano se wa vajo; na çalakî her çiyan ra ver hîşyarîya merdimayî ya û seba ke hîşê ma bêro xo ser o na çalakî zaf muhîm a. Labelê gelo çendêk wayîrê na çalakî vejîyayî û ma çendêk vejîyenî? Raşta ci merdim qet û qet nêwazeno na perse bikero. Çunkî hem hetê merdimayî hem zî hetê wijdanî ra kam beno wa bibo, kamcîn sebebî ra beno wa bibo; nê wirdî sebeban ra gere wayîrê kesa/o ke na çalakî daya/o despêkerdene bivejîyo…

Nika 61 rojî yo ke grevê vêşanî dewam keno. Sere de sîyaset dima ra komel, gere newe ra xo muhasebeyêk ra bivîyarnî û hînî çiyêk bikerî. Dewleta ke no dem de faşîzmî ser o îdare bena xura gamêk nêerzena. La naye nêna na mana ke do qet game nêerza. Heta ke xoverrodayîşêko raşt û goreyê demî nêro dayene do dewlete qet game nêerza. Eke sîyaset û komel pîya têwnêgêrî helbet zorî nêdîyena dewlete. Aye ra gere bi perspektîfêko newe Kurdî û dostê Kurdan bikewî mîyanê têwgêrêko newe. Pratîkê verên ê grevê vêşanî estî û eke merdim ê pratîkanê verênan bi ewnîyayîşêko newe şîrove bikero do bieşko rayîranê neweyan abiko. Rayîrê ke do xoverrodayîşê zindanan biresnê encam…

Helbet tena Leyla Guvene ney hepsîyê bînî zî zindanan de grevî de yî. 30 zindanan de 100î ra zêdeyîr hepsî zî 41 rojî yo ke grevê vêşanî de yê; 117 zindanan de zî gelek hepsîyê bînî zî grevê vêşanî yê 10 rojan domnenî. Goreyê beyanatan ra do hûmara hepsîyê ke bikewî grevê vêşanî bizêdîya. Nê hûmarî nîşanê ma danî ke çalakîya nikayîn bi îradeyêko pîl yena viraştene û no îrade senî ke pratîkanê verênan de nêşikîya do no dem de zî nêşiko, bireso amacê xo. Labelê çiyêk esto û no çi zî wayîrvejîyayîşê şarî yo. Kurdî pratîkanê verênan de wayîrê hepsîyanê xo vejîyaybî û bi wijdanêko pîl têwgêraybî. Aye ra seba ke grevê vêşanî bireso amacê xo wayîrvejîyayîşêko wijdanî lazim o.

Leyla Guvene û hepsîyê sîyasî bi na çalakîya xo merdimayî anî ma vîrî… Merdimayîya ke nika bi ronayîşê sîstemê faşîzmî hêdî hêdî helîyayêna ardî ma vîrî û veng danî ma; ma yê ke teber de yê… No vengdayîşê înan heta nika raştê cewabêko xurt nêame. Heta ke vengdayîşê înan rê cewabêko pîl nêro dayene, ma nêeşkenî behsê wijdanî bikî. Wijdan nika binê lingan de yo û gere ucayî ra biwerzo. Eke ma wijdanê xo bikî vindî; o wext ma do îradeyê xo zî teslîm bikî… Leyla Guvene û hepsîyê bînî seba îradeyê xo; îradeyê şarî laşê xo nayê mergî ver o, laşê ê kesan ê tu kesan ra ercanîr nîyo û do nêbo zî. Wayîrvejîyayîşê Leyla Guvene û hepsîyan, wayîrvejîyayîşê merdimayî û pîlkerdişê wijdanî yo.

Dikarî Biecibînî