Çi dinyayêka ecêb!

Çi dinyayêka ecêb! Çi şarêko ecêb! Her kes çarenûsa kurdan ser o çîyêk vano. Kurdî bîyê lete bi lete, her leteyêk çîyêk vano. Timê, no dinya senîn beno? Rojhelato Mîyanên de do çi senîn bibo? Çarenûsa şaro kurdî do senîn bo?

Dewletê girdî xo mîyan de bazaran kenê. Dewletê herême xo nata bota danê ke kurdî mebê wayîrê heqanê xo. Kurdî bi xo xo mîyan de nêbîyê yew û welatperwerî û welatrotoxî her yewê ci xeta xo ser o şinê. Na rewşe ver têkoşînê kurdî beno zeîf, la dişmenî benê bi hêz.

Wextêko dewleta dagîrkere ya faşîst wazena Rojawanê Kurdîstanî dagîr bikera. Rusya bin ra dewleta tirke gur kena ke hêrişê Rojawanî bikero û Tirkîya û Amerika bêrê têrî û şerê yewbînî bikerê. No mabên de kurdî zî lingan bin de manenê. Amerîka sîyasetêko di hetî kerde pratîze. Amerîka hem kurdî hem zî tirkan a pêkerdêne, la peynî de dî ke nêbeno yew gama balkêşe eşt. Amerîka vat ˝ez hêzanê xo peyser ancena˝. Bi na game ra pey ganî Tirkîya hêrişî Rojawanî bikerda, la winî nêbî. Tirkan zî ecele nêkerd û waştêne rewşe ra fam bikerê. Amerîka xo da kîşte û êdî winî bî ke eke dewleta faşîst hêriş bikerdêne do bi Rusya ra biameyêne têrî. Qandê cû Tirkîya ecele nêkerd.

Her kes pawibê dagirkerîya tirkan bî, la nişka dîplomasî kewt raver. Îdareya Rojawanî Fransa, Sûrîya û Rusya ra pêdiyinî viraştî. TC zî kewte hemleyanê dîplomatîkî mîyan. Badê cû Minbic kewte rojeve ke dewleta faşîst waşt Minbic dagîr bikera. Labelê heta nika o zî nêbî. Çirê? Çunke problemê Minbic, Rojawan û Cerablus ra heta Idlib problemêko mîyan dewletî yo. Çi dewlete bi însîyatîfa xo nêşena gaman bierza. Coka dîplomasî kewte dewre. Nê demî de YPG yew damusnayîş da û artêşa Sûrîye silayîyê sînorê Minbicî kerd ke vera dagîrkeriya tirke de Minbicî bipawo. Na game gamêka balkêşêr bîye. Têpey Sûrîya, Rusya û Îran vejîyayî û televîzyonan de qisey kerdî û piştgirîya xo seba vengdayîşê YPG aşkera kerdî. Bi na game ra dewleta tirke tam kewte dame. Êdî nêzanayêne çi bikera. Erdoganî berpirsîyarî rusnay Rusya, la winî yeno fam kerdene ke uca ra çîyêk bidest nêvisto.

Nika ra tepîya çi senîn beno zehmeto ke kesêk bizano. Labelê çîyo ke ez zana no yo ke; dewletanê girdî yê dinyayê û dewletanê herême qet nêwazenê dewleta tirke biba bihêz. Nêwazenê kurdî bibê wayîrê statû. Qandê cû do biwazê dewleta tirke û Tevgera Azadîye bidê şerkerdiş. Wazenê kurdî û tirkî zeîf bibê û verê xo bidê dewletanê girdan û mihtacê înan bibê. Xora dewleta tirke nê sîyasetî rê akerde ya. Timî wazena hêrîşê kurdan bikera û kurdan çin bikera. Dewlete wina ameya ayar kerdene. Dewlete raverşîyayîşê kurdan de mergê xo vînena. Coka timî hazira ke şerê kurdan bikera.

Seba ke kurdan şorişêko sosyalîst dayo dest pêkerdene dewletê girdî û yê herême nêwazenê kurdî serkewte bibê, la kurdî zî êdî bîyê wayîrê hêz. Qandê cû dewletî nêwazenê kurdan peygoş zî bikerê. Peyênîye de rewşêka wina vejîyena raste; her kes do her kesî ya têkîlîyan de bo. Her kes do biwazo yê bînan bikero qurbanê sîyasetê xo.

Goreyê naye hewceyo Tevgera Azadîye û îdarekaranê Rojawanî gaman bi hesab û bi baldarî bierzê. Çunke êdî çîyêke kurdî vindî bikerê estê. Kurdî neçar ê hem heqanê xo bipawê hem zî raverşîyayîşê xo dewam bikerê. Çunke hîna çîyê ke kurdî bikerê zaf ê.

Tu Dikari Biecibînî