Semedê Şaran Girîngîya Aştî

Serêke ma ya bîne zî bi zordestî, bêhiqûqî û qedexeyan derbas bî. Şaranê Tirkîye û Kurdanê Bakûrî serêke xo zî binê hikmê pergala tekparêze de derbas kerd û bi eynî awayî kewtî serra xo ya newî. Wina eyseno hetê ekonomî ra zî nê şarî serranê verî xirabîrê kewtî serre newî. Her çiqas dimayo ke na pergale qerarê şerrî girot û hemverê şarê Kurdî şerêke bêeman da destpêkerdişî ra tepya aborîya Tirkîye roc bi roc xirabîrê bîne zî, hetê şarî ra bi bêvengîyêka korre ameyne qebûlkerdişî. La çiyêke ecêb o no şaro ke heta eka hemverê zemo ke se ra pancas, se ra şeştî heta se ra se ameyo wer, cilan, eşyan û telefon, aw, elektrîk û gazo xozayî ser bêveng, kerr û kor mendo semedê 250 qurişî ke deyayo poşetan (xo ra pereyê ke poşetan ra yenê şinê cêbê kamî zî meselayêke bîna) bertekêke pîl mojneno ra.

Wexta merdim anêno dîmenê bertekê newînan ra di îhtîmalî yenê çimanê merdimî ver; yan sebro ke şaran hemverê nê heme zeman moşto ra biheqkerdişê poşetan dir teqayo yan zî bi qaso ke hayey înan zemê ke ameyê kerdişî ra çinêbo xo nezan verdayo. Îhtimalo yewin hemverê yê diyînê civakêke saxlemtir e mojneno ra. Çi heyf ke tenê bêbertekîya civake hemverê ardişê zeman nîya. Eynî bêbertekî, eynî kerrî, korrî û bêvengî hemverê zilmo ke na pergala tekparêze şexsê şarê Kurdî de nê serrê peyînan de ro merdimahî kerd zî moşt ra. Bi seyan şaristanê Kurdan ameyî xerakerdişî, bi seyan ciwanî, tûtî, cinî bi extiyaran wa ameyî qetilkerdişî, dar û berî ameyî veyşnayîşî ancî eynî civake bêveng kerr û korre mendebî. Û ancî hetê eynî pergala ra bi neyartîyêka faşîstî şaristanê rojava ame dagirkerdişî ey ancî bêbertek mendî û heme bêbertekî û bêvengîya înan a agamî eyro ro înan bi awayêke krîzê ekonomî geyraya a.

Wexta merdim anêno baş fam keno ke şerr û neyartîya hemverê şarê Kurdî zirar dana Tirkiye û heme şaranê aye ro zî. Şerr, neyartî û nîjadperestî beno ke desthilatan kena dewlemend la xizanî, nezanî û heme awayî ya zirar fînena mîyanê civake; aştî, heskerdiş, têduştî û merdimahî zî aramî, dewlemendî, zanyarî û weşî fînena mîyanê heme civake. Bi vatişêke bîn, civake çiqas hemverê neheqîyan bêveng bimano endeyke neheqî ro aye geyrenê a, çiqasa vengê xo veco endeyke zî risena heqanê xo yê merdimahî.

Na serra newî de zerre şarê Kurdî waştêne vero ke civaka Tirkîye na hesasî ro hemverê biheqkerdişê poşetan moşte ra hemverê neheqî û bêhiqûqîyan, hemverê tecrîdo ke endeyke serrî yo domêno bimoştêne ra û eyro bi hesasîyêka merdimahî wayîr ro nê grevê veyşanî ke şexsê Parlamentera rêzdar e Leyla Guvene de aşmêke ra zêde yo domêno bivecyayne go tengasîya ekonomî rê zî rayîrêke çareserî biameyne akerdişî. Merdim eşkeno vaco ke şerrê hemverê şarê Kurdî şerrê hemverê aramî, dewlemendî, aştî û weşîya heme şaranê Tirkîyeyo zî. Xo ra eke ma bîyarê xo vîr wextê pêvajoyê çareserî de rewşê civaka Tirkîye bi heme awayî eyroyî başîrê bi. Hetê ekonomî ra zî başîya a gamî ne ke hunerê serek û rayedaranê AKP’î bi, o rewş hunerê aştî û pêvajoya çareserî bi. Girnîgîya aştî hem hetê ekonomî ser, hem hetê aramî ser, hem zî hetê weşîya bedenê merdimî de şaran rê zehf gird a. Heta ke hetê na civake ra nêro famkerdişî no rewş go bi zêdeyî verdewam bikero.

Dikarî Biecibînî