Ji pêşketinên sala nû re amade bin

Diyar bû ku wê di erefeya sala nû de bûyerên mezin pêk bên. Hê em neketin sala nû, ji bo azadî û şikandina tecrîda giran a li ser Rêberê Gelê Kurd Abdullah Ocalan û ewlekariya wî, dengê berxwedanê hat bilindkirin.

Çirûska berxwedana greva birçîbûnê ya bêdawî û bêdorvger a Hevseroka Kongreya Civaka Demokratîk (KCD) û Parlementera Partiya Demokratîk a Gelan (HDP) ya Colemêrgê Leyla Guven a 8’ê mijdara 2018’an dest pê kiribû, bi rêzê ve li Hewlêrê 21’ê mijdarê dest pê kir û 23’ê mijdarê jî ji aliyê endamê Meclîsa HDP’ê ya Hewlêrê Nasir Yagiz ve veguherî bêdawî û bêdorveger.

Her wiha li Silêmaniyê ji aliyê Komeleya Karkerên Mezopotamyayê ve 14’ê Kanûnê greva bêdawî û dorveger, li Mexmûrê jî 16’ê kanûna 2018’an çalakiya greva birçîbûnê ya bêdawî û dorveger li Saziya Malbatên Şehîdan û li bajarê Strasboûrg a Fransayê jî 17’ê kanûna 2018’an greva bêdawî û bêdorveger a endamên sazî û dezgehên kurdî tev li bûbûn, dest pê kirin. Herî dawî li başûrê Kurdistanê li Şengalê 6’ê çileya 2019’an grev ji aliyê Meclîsa Xweseriya Demokratîk a Şengalê, Tevgera Azadiya Jinên Êzidî û Yekitiya Ciwanên Êzidî ve hat destpêkirin.

Ev hemû nîşaneyên ku sala nû wê bi berxwedan û raperîneke dijwar derbas bibe. Îro dema em lê dinihêrin, di serî de berxwedana li zindan, welat û derveyî welat tê dayîn, nîşaneyên ku wê berdêl û serketinên mezin bi xwe re bîne. Jixwe pêla vê yekê hê bi destpêkirina Şoreşa Rojava re xwe dabû der. Îro ji bo wê ye ku di hedefa rejîma AKP-MHP’ê de bakur û rojhilatê Sûriyeyê heye. Pêşketin û pêvajoyên siyasî û dîplomasiyê yên bi xwe re tîne, textê wan dihejîne. Ji bo vê yekê ye, her tim xwe davêje delinga Rûsya, Almanya û hevkarên xwe yên navdewletî. Erdogan ketiye derdê textê xwe, qet hay ji feqîr û gelê Tirkiyeyê nîne, qaşo her kêliyê bang li gel dike dibêje, ‘Tirkiye ji dest diçe, Sarikamiş û Çanakkale qîr dike’. Ev raya gel bi hildana ala nijadî, îstîsmar dikin.

Ji bo wê yekê ye divê di serî de ciwan, jin û hemû gelê kurd derfetên sala nû baş biparêzin û ji her demê zêdetir xwe li hev bigirin. Îro nebe sibe wê bi teqez bibe. Jixwe ji bo ev neyê kirin, AKP-MHP li hev dikin û mîna gurê devbixwîn, li ku dibe bila bibe, êrîşî hemû kurdan dikin û kurdan ji bo xwe wek metirsî dibînin.

Dema ku ev li dijî kurd û destkeftiyên kurdan tên kirin, divê kurd jî li hemberî vê bibin yek; ev ne bi tenê Bakur, ne tenê bi Rojava û ne tenê bi Başûr û Rojhilat dibe. Kurdistan yek e û divê li gorî wê sîng bide ber dijmin. Jixwe wêjevanê kurd Cigerxwîn jî negotiye; ‘Em nebin yek, em ê herin yek bi yek’. Ji bo vê îro em xwedî li Rojava dernekevin, sibe Başûr û roja din tişteke bi navê Kurdistanê namîne.

Sala nû ji bo serketinên mezin amade ye. Berxwedana zindanan a ji pêşengên PKK’ê di serî de Kawayê Hemdem Mazlûm Dogan, Berxwedana Çaran; Ferhat Kurtay, Necmî Oner, Eşref Anyik, Mahmût Zengîn û Berxwedêrên Mezin ên grevê Kemal Pîr, Mehmet Hayrî Dûrmûş, Alî Çîçek û Akîf Yilmaz ji bo me hiştî, îro bi heman hişmendî û biryardariyê çalakiyên wan nû dibin û ji bo azadî û şikandina tecrîda giran a li ser Rêberê Gelê Kurd Abdullah Ocalan tê kirin, di serî de li zindanan, çar aliyê welat û li Ewropayê ev agir ji nû ve geş dibe.

Wê ev agir qirêjiya faşîzmê bişewitîne û wê têk bibe. Çawa pêşengên Tevgera Azadiyê, bi helandina bedana xwe PKK mezin kirin û hildan esîman, îro jî wê bi bedenên nû faşîzm û mêtingerî bê têkbirin.

Dema dibe sala nû di çanda kurdî de ji bo pîrozkirina sala nû ‘Gexan’ digerin dibêjin; ‘Serê salê binê salê xwedê serfirazî û xweşiyê bide vê malê’. Ji bo me jî divê sala 2019’an, azadî û aştiyê bîne. Ji ber vê jî dê sala nû dijwartir derbas bibe. Li pêşiya me gelek erk û peywirên welatparêzî û şoreşgerî hene ku bêyî tenê gavek paşde bê avêtin, divê teqez di cih û demê wê de bê kirin. Divê ji bo vê em amade bin.

Serkeftin di gava yekem de ye û gelê kurd vê gavê  ji zû ve avêtiye. Niha jî dema encameke serketî û aştiyeke mayînde ye…

Dikarî Biecibînî