Werrekna

Werrekna Rojawan û Başûrê Kurdîstanî bibîyêne yew. Beyntare de sînor nêbîyêne. Kurdî winî şer bikerdêne ke Vakurê Kurdîstanî zî destê dişmenî ra bireynayêne. Her hîrê leteyanê Kurdîstanî bibîyêne yew, piştî bidayêne yewbînî û Rojhelatê Kurdîstanî zî destê dagirkeran ra bireynayêne. Ûxweş!

Verê nê xeyalanê xaman de çi bendî estê? Bêgûman bendê kurdan estê. Çunke kurdî xo mîyan de safî nêbîyê. Bala xo biderê, xo azadkerdişê kurdan de yê ke tewr zaf bendî ronayê kurdî bi xo yê. Eke kurdî xo no halê kambax ra bireynê bêgûman do şehîdî tayêr bêrê dayene û Kurdîstan zî do azad bibo.

Şorişê Vakurê Kurdîstanî ra biewnê, şorişê Rojawanê Kurdistanî ra biewnê û statûya Başûrê Kurdistanî ra zî biewnê. Dersê ke ma ci ra bigîrê nê yê: eke kurdî xo bi xo xo bikerê îrade dewletanê girdî yê dinyayê zî tede gelek hêz û rêxistin û şarî benê dost yan zî seba menfaatanê xo benê hêzê îttîfaqî.

Bala xo biderê! Başûrê Kurdîstanî yew game eşt û referandûm firaşt. Badê referandûmî se ra çewresê Başûr kurdan dest ra şewêk de şî. Rojawanê Kurdîstanî de seba ke îrade esto, bireyê xoverdayîşî esto; wexto ke serekê Amerîka îlan kerd ke do Rojawan ra bivejiyê kurdî nêbîyêne zeîf û rewşe ra feyde girewtî û hîna zîyadêr bîyêne wayîrê hêz. Vernîya dîplomasî abî. Bi hêzanê cîya ra pêdîyin amey viraştene û yenê viraştene. Bi kilmîye xoverdayîş serkewtene, teslîmbîyayîş zî xiyanetî bi xo ra ano.

Bi kewtena serra newe ra Vakurê Kurdîstanî de ruhê xoverdayîşî bîyo berz. Peynîya na serre de ma vînenê ke ruhê berz yê şehîdan do senî serkewtişanê newe dîyarî şarê kurdî bikero. Rojawanê Kurdîstanî de heme hêzanê leşgerî û şar winî motîvasyon bîyo ke her kes wazeno ser bikewo. Qandê cû tena xoverdayîşî ser o vindeno. Birebîyayîş û bireyê xoverdayîşî winî kerd ke sere de dewleta tirke ya faşîst fek dagirkerdişê Girî Spî û Serê Kanî ra verdo. Fek dagirkerdişê Minbicî ra verdo. Êdî winî bî ke nê rojanê peyênan de Idlib de çete têkewtişêko gird de yê. Yeno fam kerdene ke Surîye de destê desthilatîya Tirkîya beno zeîf. Destê kurdan beno bi hêz. Êdî winî bîyo ke tay nuştoxî meqaleyê xo de vanê kurdan ayarêko barîk da Amerîka. Hey gidî dinya, kotî ra kotî. A Amerîkaya ke taybet tay partîyanê Başûr sey peyayê xo bikar ana Rojawayê Kurdîstanî dest ra ayarêko barîk vînena. Bêgûman wina yo. Amanc zelal ba, îrade estbo, xoverdayîş û şehîddayîş est bo do serkewtiş zî bibo para kurdan.

Nika wext o. Na serra ke ma newe kewtî de do serkewtişanê newîyan dîyarî kurdan bikero. Tena wa kurdî verê xo de bendan nêronê û xo rê çalan meaşanê. Verê ra wina ameyo tespîtkerdene û roje bi roje rastîya nê tespîtî zî vejîyena raste. Kurdî ganî hem vera dişmenê teberî hem zî vera dişmenê zereyî mucadele bikerê. Nêke kurdî vera dişmenê teberî de serkewte bibê zî dişmenê zereyî do winî bikero ke kurdî fina vindî bikerê û yê ke xo ver ro danê bêrê kiştene yê ke xo ver ro nêdanê zî teslîm bêrê girewtene.

Boka na rey kurdî vera her di dişmenan de zî serkewte bê. Êdî ma mevajî werrekna û xeyalanê xaman mezgî xo de mevirazê. Xeyalê ma bibê rastî û hew.