Medya û sîyasetê nefretî

Îktîdarê Serekkomarîye, no welat de hima-hima heme sazî û dezgeyî girewtê binê kontrolî xo. Tirkîya de bê tayê rajnameyan, çend televîzyonan û tayê keyepelanê înternete, medyaya Tirkîya; bi temam propagandaya Îqtîdarê Serekkomarîye kena. Raşta ey, na medya de; çîyêko enteresan û newe çin o. Medyaya Tirkîya, hetê fikrîyatî ra zaf sefîl a. Na medya; bêteraf nîya. Polîtîka de resmen terafê xo, bellî/dîyar kerdo. Noştoxê na medya, bi temam wesfanê Serekkomar Tayyîp Erdoganî danê. Na medya di çîyanê bînan zî rind kena. Yew het ra dînê îslamî xo rê kenê alet, yewna het ra wardenê roşenê propagandaya tirkîtîye kenê. Nê nuştoxî, bi îradeyê xo, nişnê yew cumle zî binusê. Ez ray-ray wazena ke, nuşteyanê na medya biwana. Raşta ey, ez hewnêna ke nê merdimî, çiyanê vengan nusenê. Tirkan rê propagandaya tirkan kenê. Hima-hima têde, qelem û vateyê xo de, borûzaneya cengî kenê Ez nê televîzyonan temaşe nêkena, rojnameyanê na medya hinê nêwanena.

Unîwersîteyan û dibistananê Tirkîye de merdimêko bi îrade û azad û bi huner nê, merdimêko îtaatkar û bêhuner esas gêrêno. Tayê mamosteyê unîversîteyan; rojnameyan û keyepelan de nusenê, beştarê programanê televîzyonan benê. Nê merdimî goya rojevê Tirkîya ser o krîtîkan kenê. Nê merdimî zî polîtîkaya cengî rê xizmet kenê. Yanî vernîya nameyê înan de prof bibo zî vateyê înan de, îlm çin o, çîyo newe çin o. Tena ceng û polîtîkaya şdetî rê xizmet kenê. Unîversîteyan de, mamosteyanî ke vera cengî û polîtîkaya nefretî, mûxalefet kerdo, zafê înan bi qerarnameyan gure ra ameyê girewtiş.

Yew het ra, merdîmî wendey û biaqil Tirkîye ra remenê. Yewna het ra sermayedarî, serweta xo Tirkîye ra remnenê. Sermayedarî zî xo emnîyet de nêveynenê. No semed ra Tirkîye ra remenê. Çunku, Tirkîya de heq, huqûq û demokrasî çin o. Bi temam kulturê nefretî hakim o.

Serekkomar Erdogan, zonê şîddet û cengî şûxûlneno. Semedo ke rayanê xo vêşî biko, zereyê Tirkîye de û teberê Tirkîye de, hêrişê kurdan keno. Her weçînayîş ra vîyar, tam yew psîkolojîyê cengî dekeno dewre. Aseno ke weçînayîşê 31ê Edare ra ver zî semedo ke bidekewê Rojava, hedreya cengî kenê. Labelê aseno ke, no hêriş, Tirkîye rê zaf vay mal beno. Yewna het ra, Tirkîye de zî operasyonê leşkerî û sîyasî dewam kenê. Her weçînayîş ra ver, tehdît, hêriş û girewtişê binê çiman vêşî benê. Eke ina hewa dewam biko, Tirkîye de yew qrîzo pîl vejîno.

Trûmpî yew twittê xo de vato ke; ”Eke Tirkîye, hêrişê kurdan biko/bikero, ma ekonomîyî Tirkîye, wêran/mahf kenê. Aseno ke no xusus de, Trûmp blof nêkeno.” Trûmp, telefon de zî Serekkomar Erdoganî ra vano ke; “Ganî Tirkîye; vera kurdan, Hêzanê Sûrîyeya Demokratîke û komanê bînan yo ke vera DAIŞî şer kerdo, bi hewayêko xirab tênêgeyra.” Yewna het ra Amerîka, sindorê Tirkîya û Rojavanê Rojeva de, bi xorîneya 32 km, yew heremê Tamponî pêşnîyaz kerdo. Teferûatê nê heremê tamponî hima bellî nêyo. Kam/kamî nê heremê tamponî kontrol keno/kenê hima bellî nîyo.

Wezfeyê medya, polîtîkaya ceng û polîtîkaya nefretî rê xizmetkerdiş nîyo. Na medya, bi temam polîtîkaya faşîzane rê xizmet kena. Wezfeyê medya, ganî vera îqtîdarî, bêteraf bivindertînî û wexto ke hewce bikerdnî ganî îqtîdar rexne bikerdnî. Xora Sîstemê Serekomarîye; yew medyaya mûxaxalîf û fikr û vengêko cîya nêwazeno. 141 yew rojnameger debîyê zîndanan. Vajîno ke; “Medya; qûvetêko çarin o.” La çi heyf ke, bê medyaya mûxalîfe, ‘medyaya Hawûze’ sinif de menda. Na medya semedo ke îqtîdarê Serekkomarîye ra miqat bena, tena nê sîstemî rê xizmet kena. Ma na medya ra hinê têkoşêna heq, huqûq û demokrasî nêpawenê. Tirkîya de, eke nê çewres serrî yo ke, gonîya ciwananê kurdan û tirkan billa (vila) bena, billakerdişê na gonî de bara/para na medya zî esta.

Dikarî Biecibînî