Her ca, cayê çalakîyan o!

Leyla Guvene ya ke laşê xo naya mergî ver o; 75 rojî yo ke grevê vêşanîye de ya. Tena Leyla Guvene ney sey aye 250 ra zêde hepsî grevê vêşanîye de yê û do hûmara çalakvanan bizêdîya. 75 roje kêmî nîya û hînî ma eşkenî vajî ke cuya Leyla Guvene telûke de ya. Naye hetê gelek kesan ra yeno zanayene û sere Kurdî, dostê Kurdan naye ser o kenî ke çalakîyan virazî. Bi no qeyde zî mîyanê şarî de hîşyarîyêk bivirazîyo. Labelê nêzdîbîyayîşê dewlete ma ver bi prosesêko xidar beno. Dewlete berê Îmrali seba nêm saet akerd û birayê Rayverê Şarê Kurd Abdullah Ocalanî, Mehmet Ocalan şi Îmrali. Ne Leyla Guvene ne zî hepsîyê bînî naye qebûl nêkerdî û hema zî çalakîya xo domnenî. Dewlete vatêne qey sey 2016î do berê Îmrali akero û çalakîyî zî biqedîyê. La nêzana ke îradeyo nikayîn ê her wextan ra xurt o û heta encamêk nêgîro fek çalakîya xo ra veranêdano. Seba ke na çalakî Kurdistan, Tirkîye û dinya de vila biba teber de zî hîşyarî virazîyena. Gelek cayan de seba paştîdayîşê çalakîya hepsîyan çalakîyî yenî viraştene û şar wazeno ke nê çalakîyî her ca de vila bibî…

Roja şemeyî Amed de seba Leyla Guvene û hepsîyanê bînan mîtîng virazîya. No mîtîng mojna ma ke şar paştî dana hepsîyan û her çiyî ra hayîdar a. Mîtîng de 7 serrî ra heta 70 serrî gelek kesî bibî û vengêk tena berz bîyêne, ‘Biciwîyo xoverrodayîşê zindanan’… No veng en nêzdî 2012î ano ma vîrî. Çalakîya grevê vêşanîye yê 2012î de îradeyêko pîl vejîyabi û o îrade heme welatî de no veng kerdêne berz. Helbet merdim goreyê proseso nikayîn nêeşkeno ê rojan şîrove bikero. Labelê her çiqas cîyayîyê prosesan bibî zî merdimî ke qadan de yî û wayîrê îradeyê xo vejîyenî eynî yê. Gelo eke eynî merdimî qadan de bî çira îradeyo pîl xo nêmojneno û vengêko berz nêvejeno? Ge ge nê persî ver o sereyê merdimî kenîyeno, gelo çira? Çira Leyla Guvene û hepsîyî tena verdîyenî? Çira ma nêeşkenî bêvengîye ra bixelesî? Çira ma nêeşkenî her ca de behsê xoverrodayîşê zindanan bikerî? Çira?

Helbet cewabê nê persan gelek ê. Merdim eşkeno cewabanê zaf hîrayan zî bido labelê meseleya esasin hêrişê dewlete yê 3 serranê peyênan o. Dewleta Tirke wina kerde ke şar her çiyî ra xo dûrî bifîno û qet vengê xo nêvejo. La naye nêna a mana ke do her tim wina bo. Mîtîngê Amedî mojna ma ke hêrişê dewlete bibî zî merdimê biwijdanî her çi ver eşkenî bêrê pêhet û wayîrê îradeyê xo vejîyenî. Wa mîtîngê Amedî bibo gama yewine. Wa şar bi ruhê mîtîngî her keye de her kuçe de her taxe de wayîrê îradeyê xo bivejîyo. Na game wa biba destpêkê çalakîyan; çunkî ma zanî ke seba şarî her ca, cayê çalakîyan o! Ma zanî ke şar wijdanê xo vindî nêkerdo û do zindanan rê wayîrtî bikero. Her çi ra ver gere sere de ma verê xo tadê kuçeyan û uca de vengê xo bivejî. Medyaya komelkî de bi parkerdişê fotograf û vîdeoyan ma tena eşkenî propagandaya xo, xo rê bikerî; heta ke vengê ma kuçeyan de nêbo, heta ke ma her ca nêkerî cayê çalakîyan, heta ke ma vengê Leyla Guvene û hepsîyan nêresnî heme keyeyan, heta ke ma linganê xo ser de bi vengêko berz nêvajî ‘Biciwîyo xoverrodayîşê zindanan’; ma do nêeşkî wayîrê îradeyê zindanan bivejîye.

Dikarî Biecibînî