Na Bêvengî Nemerdî Ya

Grevê veyşanî yê parlamenter Leyla Guvene ke rocê 8ê Teşrîna Peyêne de dest bi ci kerda ver bi xetereyî şino la, verepers û rayedarê na desthilatî û pergala tekparêze hemverê nê rewşî yew û nîme xo ra zî nînê war û bêvengîya xo ya kor û kerre domnenê. Yeno dîtişî ke roc bi roc weşîya Guvene zêdetir kona xetere û çi heyf ke civake zî bêveng a! Lazim o ma nê zî bizanê ke bi nê awayî şoro tenê weşîya Guvene nêkono xetere weşîya heme civake bi xo zî kono xetere. Sey ke ma zanê hetê na desthilatîya tekparêze ra neheqî û bêhiqûqîyêka pîle ro parlamentera kurd e ame kerdişî û hema zî bi awayêke bêhiqûqî yena pêgirotişî. La ancî zî parlamentera ma ya ercyayî neheqî û bêhiqûqîya ke ro şexsê aye ameyo kerdişî da hetêke û semedê wedartişê tecrîdo ke bi serran o bi awayêke neheqî û bêhiqûqî Rayverê şarê kurdî ser de yeno domnayîşî bêro wedartişî kewte grevê veyşanî û nika heştay rocê xo grevê veyşanî de vîyarnena.

Her çiqas desthilatîya fenbaze waşt sey çend rayê verînan bi pêvînayîşê rocêke yê Rayverê Şarê Kurdî di şexsê Leylaya ma de civake bixapêno zî aye na fenbazîya înan qebûl nêkerde û da zanayîşî ke AKPyî serra 2016î de zî dimayê dest pêkerdişê grevê veyşanî Mehmet Ocalan şirawitib pêvînayîşê Ocalanî înan zî peynî ro grev ardib la dimara tecrîd ancî amebi domnayîşî loma heta tecrîd bi temamî nêro wedartişî go grevê ma bidomyo. Eyro ma benê şahid ke na cinîya kurd e bi qehremanî dimayê biryarê xo ya û desthilatîya tekparêze zî bêvengîya xo domnena. Ma zanê ke goreyê qanûnanê dewlete Tirkîye ra zî goreyê yê dewletanê mîyanneteweyî ra zî tecrîdo ke ro Rayverê Şarê Kurdî ameyo rûnayîşî sûcdarîyêka ro heqê merdimahî ya la verepers û rayedaranê na dewlete zî hiqûqnasan û demokratanê mîyanneteweyî zî bi serran o xo ro bêvengî dayo ro.

Eyro roc hemverê nê tecrîdî zî, hemverê nê grevê veyşanî zî bêvengîya verepers û rayedaranê na dewlete û ya qiwetanê mîyanneteweyî pîya hemparîya na sûcdarî ya, nemerdî û bêînsafî ya. Bi eynî awayî bêvengîya şarê kurdî bêxîretî ya û bêvengîya heme civaka Tirkîye zî bêxemî û nezantî ya. Her çiqas hetê na desthilatî ra bêro înkarkerdişî zî eyro roc tengasîya ke dewlet û civake kewtê ci verdewamkerdişê  tecrîdî de û dişmintîya kurdan de israrkerdişî ra yo. Heta na desthilatî dişmintîya xo ya hemverê şarê kurdî û Rayevertîya înan bidomno go rewşê siyasî, civakî û aborî yê şaranê Tirkîye zî bi nê awayî ver bi xerabî şoro. Barê serê milê Leylayan barê heme şarê kurdî yo.

Verepersîya ke Guvene giroto xo ser verpersîya heme civaka Tirkîye ya. Heta ke şarê kurdî ro nirxanê xo, ro îradeyê xo wayîr nêvecîyo go desthilatîya tekparêz e yew û nîme xo ra nêro war û heqê pêkardişê heme qayde bêhiqûqîyan xo de bivîno. Ancî heta ke heme şarê Tirkîye ro heq û hiqûqê merdimahî wayîr nêvecîyo go hetê na desthilatî ra heme heqanê xo yê merdimahî, civakî û aborî ra bêpar bêrê verdayîşî. Lazim o ma nêkerê xo vîr ra ke binligkerdişê heq û hiqûqê tenêke binlingkerdişê heq û hiqûqê temamê civake yo. Heqê her merdimî/e yê wayîrbîyayîşê heq û hiqûqanê merdimahî esta û lazmatîya her civake bi demokrasî, edalet û têduştî esta. Bi paştîdayîşê ro Leylayan ma eşkenê wayîr ro nê heqanê xo zî vecîyê.

Dikarî Biecibînî