Tecrîd her ca de esto!

Wexto ke ma vanî tecrîd, zaf çiyî yenî ma vîrî. Meseleya esasin a tecrîdî rewşa Rayverê Şarê Kurdî Abdullah Ocalanî ya. Helbet na raştî nêna redkerdene. Labelê ma 3 serranê peyênan de weş musayî ke tecrîdo ke heta nika Rayverê Şarê Kurdî ser o bi, hînî heme komelan ser de yo… Pêrûnê Tirkîye nika binê tecrîdî de yo. Aye ra perspektîfo nikayîn yan zî fokusa ma ya ewroyîne bi temamî tecrîd o/a. Çiyê ke qewimyenî heme dorûverê na çekûye de qewimyenî.

Tecrîd 19 serrî yo ke Îmrali de esto, Rayverê Şarê Kurdî Abdullah Ocalanî heme pêvînayîşanê xo ke mîyanê endêk serran de kerdibî de behsê tecrîdo ke ey ser de yo kerdêne. Ma pêrûne rewşa Îmrali zanayêne û sere de Hereketa Kurdî, heme hetî ke dorê Rayverê Şarê Kurdî de ameyêne pêhet, seba ke tecrîd wedarîyo kewtêne mîyanê têwgêrêk û rayîranê wedartişê tecrîdî gêrayêne. Wext bîyêne bi nê rayîran tecrîd wedarîyayêne; wext zî bîyêne ke prosesî hêna zêde bîyêne lêle û peynî de hêna tecrîd bi hewayêk ameyêne şikitiş. Labelê wexto ke ma nika tede yî, ê wextan ra zaf zaf cîya yo û gere rayîrê ke peyda benî ê wextan ra cîya bî. Grevê vêşanîye ê rayîran ra yew o; her tim ameyo şuxulnayîş û bedelê giranî dîyayî. Nika hêna eynî rayîr ser o têwgêrêk esto û hêna ma ver bi bedelanê giranan şinî. La Dewleta Tirkî ya ke heta nika bi hewayêk bo zî berê Îmrali akerdêne, hêna akerd, la ma nêeşkenî vajî ke tecrîd wedarîyayo û hînî grevî qedîyenî.

Parlamentera HDPî ya Colemêrgî û Hemsereka KCDî Leyla Guvene hema zî grevê vêşanîye de ya. Guvene hetê mehkema ra serbest veradîya, a bi xo peyê qirarê xo de vindert û vat ke, heta ke tecrîd nêqedîyo aye do çalakîya xo bidomîna. Xura zindanan de zî rewşe eynî ya û gelek cayan de kesê ke kewenî grevê vêşanîye zêdîyenî. Teber de zî bi serbestveradayîşê Leyla Guvene do çalakîyî bizêdîyê. La meseleya esasin çiyê ke ma sere de vatî yê. Mesela tecrîd a û tecrîd pêrûnê Tirkîye de esto. Eke sîyaset bieşko na raştî komelan rê bido qebûlkerdene do rewşa nikayîn zaf bibedelîya. Helbet rayîrê vatişê na raştîye bedelînî la merdim eşkeno nimuneyan bido. Nimune, heme sendîkayî binê tecrîdî de yî, heme sazî û dezgehê heqê merdiman binê tecrîdî de yê, komelî, zanîstgehî, partî, cemeet, terîqet, dergah… Gelek cayî nika binê tecrîdî de yî. Her yew goreyê xo binê tecrîdî de yo; xura Rayverê Şarê Kurdî Abdullah Ocalanî zî pêvînayîşê xo de naye ser o vinderto; ‘Şima zî binê tecrîdî de yî, heta ke şima tecrîdo ke şima rê beno nêqedînî, şima do nêeşkenî tecrîdo ke mi ser de yo biqedînî.’ Naye ‘Şima zî binê tecrîdî de yî.’ çiyo ke zaf muhîm o; eke merdim analîzê tecrîdî newe ra bikero û heme hetan ra bi metodêko newe bivajo do zaf çiyî bibedelîyê. Ma zî sey çapemenî eşkenî xura destpê bikî; tecrîd ma ser de zî esto. Heta ke tecrîdo ke ma ser de esto, ma nêqedînî ma zî nêeşkenî raştîyanê xo bi zelalî biresin komelan. Aye ra wa fokusa ma tecrîd bo, o wext ma eşkenî bi metodanê neweyan hem tecrîdo xo ser hem zî tecrîdê Îmrali biqedînî…

 

Dikarî Biecibînî