Hemverê Dagirkerî û Nokerî Xoverdayîş

Bi seyan serran o welatê ma hetê dagirkeran ra ameyo dagirkerdişî û ancî bi seyan serran o têkoşîn û xoverdayîşê ma zî hemverê dagirkeran domêno. Rayîrê azadî de zehf awayê têkoşîn û xoverdayîşî ameyî dayîşî, înan ra yew grevê veyşanî yo ke nizdê çewres serre yo Bakûr de hemverê neheqî û zordestîya dagirkeran sey xoverdayîşêke pawitişê azadî û heqanê xo yê merdimahî yeno pêkardişî. Rocê ma yê eyroyî de zî her çiqas desthilatîya tekparêze xo ro kerrî û korrî rûno zî pêwa parlamentera ma ya rêzdare Leyla Guvene ya bi seyan giroteyê azadîye û şarê ma yê Başûrî ra bigî heta yê Ewropa nê awayê xoverdayîşî semedê wedartişê tecrîdî bi qerar domnenê. Û ancî awayêke bîn ê têkoşîna azadîye ra zî çalakîyê hemvervetişê qetlîaman o ke hetê dagirkeran ra yenê pêkardişî. Ma mîsale nê zî nizd ra Başûr de, dimayê bombevarana Tirkîye dî. Şarê ma yo ke bêvengîya hikûmatê herême ke hemverê qetlîamê 23’yê Çeleye moşt ra qebûl nêkerd û dest bi çalakîya pawitişî kerd, ters û xewfêke pîl vist zerreyê dagirkeran.

Sey ke ma zanê heta nika bi desan hemwelatîyê ma yê Başûrî hetê dewleta Tirkîye ra ke bi desserran o bi hetkarî û destekê PDK’î Başûrê welatê ma dagir kerdo ameyê şehîdkerdişî û dewê înan ameyê xerakerdişî la, heta nika hetê rayedaranê PDK’î ra ke xo sermyan û wayîrê Başûr û hemwelatîyanê ma yê ewcay vîneno(!) bertekêke tewr qice zî hemverê kerdişanê Tirkîye nêameyo ramoştişî. Şarê Kurdî 23’yê Çeleye de herêma Behdînanî de ancî bi şahidê êrîşê hewayî yê Tirkîye û qetilkeridişê çar hemwelatîyanê xo yê ciwanan. Dimayê êrîşo hewayî yo peyîn ê dewleta dagirker e û şehîdkerişê çar hemwelatîyan ke 23’yê Çeleye de Dêraloke de bi bombevarana desthilatîya Tirkîye ameyî şehîdkerdişî şarê ma yê na herême hîrê rocê pawit ke rayedarîya PDK’î ke xo sermîyanê ewcayî vînena hemverê nê qetlîamî vecîyo û dewlete Tirkîye ra hesabê hemwelatîyanê xo biwazo.

La dimayo ke anyayî hîrê rocî zî ser de derbas bi ti hesêke înan ra nêvecêno nêwaşt bêveng bimano û hemverê hovîtîya ke dewleta dagirker e înan ser de pêk ardo 26’ê Çeleye de serre dart we û Şêladize de eşt baregehe eskerî ya Tirkîye ser. Dimayê serrewedartişê şarê ma yê a herême Berzanîyanê ke hemverê qetilkerdişê çar hemwelatîyanê xo serreyê xo vistib mîyanê qûmî û xo lal û kerr kerdibi bi veyşnayîşê di hebî wesayîtanê dagirkeran serrey xo vet teber û sey zerrece bî qibe qibe înan. Bi raştî îzahatê ke Berzanîyan dayî sey zimînîya vengê Erdogan û Akarî ro merdimî bigyro a bi.

Ferqêke mîyanberê vatişê Berzanî û Akarî de çinê bi. Heta dimayê îzahatanê xo ra Berzanî hetê dagirkeran ra ameyî teqdîrkerdişî. Bi cadayîşê baregahanê Tirkîye ke Berzanîyan bexşê înan kerdo û bi vatişanê xo yê ke înan paweno ma vînenê û benê şahid ke Berzanîyan Başûr kerdo malê Tirkîye û eke destê ey ra bêro nê perçeyê welatê Kurdan ro Kurdan bi xo bi temamî qedexe keno. La dagirker û nokeranê înan rayêke bîne zî dî ke şarê Kurdî bi qerar o ke axa xo teslîmê dagirkeran nêkero û hemverê heme awayî dagirkerî û nokerî xo ver bido û bi ser biko.

Dikarî Biecibînî