Xoverrodayîş eîdîyetî ra yeno

Tarîxê merdimayîye reseno milyonan serran; merdim/e roja ke xo şinasnayo/a, heta nika mîyanê gêrayîşan de bîyo/a. Gêrayîş, hem seba temamkerdişê şinasnayîşê xo hem zî seba sibarojêko raşt û zelale, merdimayîye ra bîyo ferz. Seba merdimayîye rayo tewr verên gêrayîş bîyo û sere de merdimî nê gêrayîşî de resayî yewbînan; dima ra resayî mezgêko hempar. Resayîşê merdiman ê pêhetî ra  dima komî virazîyayî; nê komî pîya têwgêrayî û gêrayîşê  merdimayîye bi no qeyde dewam kerdo. Gêrayîşo ke ma rê bîyo ferz, ma ra tay çiyan waşto; mucadele û xoverrodayîş… Mucadele bikerên û xo ver bidên, do şima biresî amacê xo. Nê wirdî çiyî bîyê rayverê merdimayîye; kam ke waşto bireso/a amacê xo tim û tim xo ver dayo/a û mucadele kerdo/a. Helbet mucadele û xoverrodayîş bê bawerî û eîdîyet nêbîyê û qet nêraseyê amacê xo. Aye ra merdimo/a ke waşto/a xo ver bido/a û mucadele biko/a, bîyo/a wayîrê/a bawerîyêk û xo de hîsê eîdeyetî bica kerdo/a. Kurdistan nê wirdî çiyan ser o resayo nê rojan û heta nika Kurdistanijî bi bawerî û eîdîyetî lingan ser de vindertî.

Ewro hêna sey verî Kurdî mîyanê mucadele û xoverrodayîşî de yî. Bi bawerîya xo ya pîl û bi eîdîyatêko raşteqîn xoverrodayîşê xo domnenî. Gêrayîşê Kurdan roja ewilî ra nata nêvinderto û heta hetayî zî nêvindo. Senî ke Kurdistan de xo ver danî; bi ruhê eîdîyetî heme cayanê dinya de xoverrodayîşê xo domnenî. Demo ke ma tede yî de hêna sey her deman xoverrodayîşêk esto. No xoverrodayîş bi grevê vêşanîye ke Leyla Guvene da destpêkerdiş, dest pêkerd. Xoverrodayîşê Leyla Guvene sey roja ewilî ya merdimayîye bî û sey destpêkerdişê gêrayîşêko pîroz ma eşkenî qebûl bikî. Mîyanê nê gêrayîşî de hem bawerîyêka pîl hem zî eîdîyetêko xurt estî. Aye ra kesê ke Leyla Guvene teqîp kerdî zêdîyayî û zêdîyenî. Zindanan ra bigîrên heta çar perçeyê  Kurdistanî, Kurdistanî ra zî çar hetê dinya; her ca de no xoverrodayîş vila beno û kesê ke wayîrê  eynî bawerî û eîdîyetî yê dorê  xoverrodayîşî de yenî pêhet.

Xoverrodayîşo nikayîn sey perçeyêkê xoverrodayîşo pîl o û bi îradeyêko pîl dewam keno. Tecrîdo ke Rayverê Şarê Kurdî Abdullah Ocalanî ser de yo sebebo en pîl ê xoverrodayîşî yo û tena tecrîd ney hêrişê ke Kurdan û dostê Kurdan ra benî zî sebebê xoverrodayîşî yê. Leyla Guvene seba ke xo eîdê welatê xo hîs kena û bi bawerîyêka pîle girêdayîya mucadeleyê xo ya kewte grevê vêşanîye, embazê aye ke zindanan de yî zî eynî tewir ê û ê zî nê sebeban ra bîyê perçeyê pîl ê nê xoverrodayîşî. Başûrê Kurdistanî de Nasir Yagizî zî eynî tewir o û o zî seba ke xo eîdê welatê xo hîs keno û wayîrê bawerîye yo kewt grevê vêşanîye. Kesê ke Ewropa û cayanê bînan de kewtî grevê vêşanîye û bîyê perçeyê nê xoverrodayîşî bi eynî hîs û îradeyî xoverrodayîşê xo domnenî. Bawerî û eîdîyet vernîya xoverrodayîşêko pîl akerdê, hînî se beno wa bibo kesê ke xo eîdê welatê xo, rûmetanê xo hîs kenî perçeyê nê xoverrodayîşî yê. Her çi ra ver meseleya esasin eîdîyet o û heta ke ruhê eîdîyetî ma de xo nêmojno ra ma nêeşkenî bibê perçeyê nê xoverrodayîşo pîroz. Aye ra xoverrodayîş eîdîyetî ra yeno!

Dikarî Biecibînî