Grevê vêşanîye û weçînayîş

Bakurê Kurdistan de di serran ra dima rojeve zaf dekerde ya û merdim eşkeno vajo ke welat hêdî hêdî agêreno eslê xo ser o. Bi destpêkerdişê grevê vêşanîye her çiqas sere de mîyanê komelî de hîşyarîyêk nêvirazîya zî naye wina dewam nêkerd û komel kewt mîyanê hîşyarîyêk. Hem Leyla Guvene hem zindanî hem zî teberê welatî de grevê vêşanîye dest pêkerdibî û waştişê înan waştişê heme şarê Kurdî bi. Kurdî rîyê prosesî û polîtîkayanê dewlete ver o bi serran o ke nêeşkayêne nê waştişê xo îfade bikerî. Bi grevê vêşanîye vernîya îfadekerdişê waştişî abi û esasê xo de grevê vêşanîye seba demo newe bi mîladêk.

Tecrîdo ke Rayverê Şarê Kurdî Abdullah Ocalanî ser de yo, 2015î ra nata dewam keno û seba ke berê  Îmrali hetê dewlete ra ameyo qefelnayene, şero ke Ocalanî demê prosesê çareserî de behs kerdêne bi xorîn û resa nê rojan. Sere de Bakurê Kurdistanî, dima ra hem Başûr hem zî Rojawanê Kurdistanî de bi hêrişanê Dewleta Tirkî şer her wextan ra hêna zêde xo mojna. Û her çiqas Kurdî seba rayîrê çareserî vengdayîşanê pîlan bikerî zî dewlete vernîya heme rayîran girewt û aye ra proses her wextan ra hêna zêde bi xirab. Na xirabî, xirabîyêka normale nîya. Çunkî prosesê verê 2015î ke ma peyeyê xo de verda, ê nikayîn ra zaf cîya bi û beno ke ma 2015î ra dima goreyê ê wextan proseso newe şîrove kerdêne. Labelê hînî wina nîyo, goreyê demî Kurdî şîroveyê  rewşan kenî, goreyê şîroveyanê neweyan gaman erzenî û kewenî mîyanê têwgêrêk.

Grevê vêşanîye zî goreyê demî dîya destpêkerdene û gama ke bi grevê vêşanîye ameye eştene do seba sibarojî zaf muhîm bo… Nika 96 rojî yo ke Leyla Guvene, 84 rojî yo ke Nasir Yagiz, 58 rojî yo ke zindanî, 57 rojî yo ke Ewropa û cayanê bînan de grevê vêşanîye dewam keno. Serra 2012î de grevê vêşanîye ke hema hema bi eynî waştişan virazîyabî 68 rojan dewm kerdibi û peynîya greve de waştişê hepsîyan ameybî qebûlkerdene. Labelê ne proses prosesê 2012î yo ne zî dewlete sey dewleta o wextan a. Aye ra meseleya şîroveyê goreyê demî zaf muhîm a. Gere merdim goreyê şertanê 2019î biewno kerdenan rê û goreyê aye gaman bierzo. Helbet peynîya nê prosesî de yê ke bedel dayî do serbikewî. Labelê rayîrê bedeldayîşî û estbîyayîşê rojevanê bînan wextê serkewtişî keno derg.

Rojevanê bînan, yan zî çiyê ke vernîya na rojeva esasî de ca gênî ra yew zî rojeva weçînayîşê herêmî ya. Gere polîtîkayêka winasî bêra kerdene ke hem greve hem zî weçînayîş pîya bikewî rojeve û pîya mîyanê şarî de bica bibî. Hêvîya yewine hîşyarî ya. Eke şarê Kurdî sey verî bêro xo ser do hîşyarîyêka pîle bivirazîya û do serkewtiş hêna nêzdî bo. Ma do rojanê ameyenan de bivînî ke greve û weçînayîş senî do pîya rayîrî ra şêrî û ma do senî bieşkî biresî serkewtişanê pîlan yan zî waştişanê xo.

 

Dikarî Biecibînî