Rayşîyayîşê HDPyî û tersê dewlete

Rojêka tarî û hewrine de, roja ke seba Kurdan sey roja nefretî ya, roja ke Leyla Guvene greva xo resnaybî 100 rojan… A roje de Kurdistan de çalakîya ke ruh da kuçeyan virazîya. Destpêkerdişê grevê vêşanîye ra nata pêrûnê Kurdistanî de kesê wayîrê wijdanî peyê çalakîyan de yê û kenê ke ruhê bêvengîye yo ke nêzdîyê 4 serran o welatî de bîyo serwer biqedîyo. Labelê kerdenê dewlete nêverdenê ke şar bivejîyo kuçeyan û bireso ruhê xo yo verên. Helbet merdim tena nêeşkeno/a behsê kerdenanê dewlete biko, gere biewno kerdenanê xo rê zî. 4 serranê peyênan de Kurdî se kerdî, senî eşkayê bibê cewabê hêrişanê dewlete û kerdenanê lêşinan. Tena Kurdî ney hetê ke binê tedayîyêka pîle de yê se kerdî û çendêk waştî binê teda û zilmî ra bixelesî.

Bi destpêkerdişê çalakîya grevê vêşanîye heme kesan de muhasebeyê wijdanî virazîya û hema zî a muhasebe dewam kena. Kesê ke na muhasebe ser o fikiryayî, newe ra kenê ke bibî wayîrê wijdanî û goreyê demî têwbigêrî. Raşta ci na muhasebe ê wextan ra zorêr a û gere her kesêk hetê xo ra muhasebeya xo bikero. Her çi ra ver gere merdim bizano/a ke deyndar o/a, çunkî bi serran o ke, seba ke ma helmî bigîrî û ma bieşkî bi estbîyayîşê xo bicuyî xoverrodayîşêko pîl esto û ma vera kesê ke xo ver danî deyndar ê. Nika zî eynî xoverrodayîş hem koyan de hem zindanan de hem teberê welatî de hem kuçeyan de esto. Yê ke xo rê vanî ma wayîrê wijdanî yê gere nê xoverrodayîşî rê wayîr bivejîyê. Leyla Guvene, seyan hepsî, kesê ke teberê welatî de greve de yê; heme seba Kurdan, seba merdimayî na çalakîya xo domnenî. 100 rojan ra zêde yo ke Leyla Guvene greve de ya û roja 100ine ya çalakîya Leyla Guvene, 15ê sibate bî. Rojêka tarî de xoverrodayîşê Leyla Guvene û embazanê aye her cayê Kurdistanî ra vat ke, xo ver bidêne do şima roşnîye bivînî…

Wekîlê HDPyî seba ke roja 100ine de bibî vengê Leyla Guvene, embazanê aye û 15ê sibate şermezar bikerî, heme cayanê Kurdistanî ra kewtî rayîr û verê xo tadayî verê banê Leyla Guvene. Rayşîyayîşê wekîlan seba şikîyayîşê bêvengîye gamêka pîle bî aye ra dewlete vera rayşîyayîşê wekîlan her tewir hêrişan viraşt û waşt ke rayşîyayîşê înan biedelna. Labelê wekîlê HDPyî bi îradeyêko pîl o ke înan Leyla Guvene û embazanê aye ra girewtibî kewtî rayîr û xo resnayî fekê berê Leyla Guvene. Dewlete bi kerdenanê xo tersê xo yê bi serran mojna her kesî. Seba wekîlan bi hezaran polîsan bica kerd û her ca de bi wesaîtanê xo yê zirxînan, bi panzeran û gelek çiyanê bînan vernîya wekîlan girewt. Esasê xo de tersê dewlete bi qiseykerdişê Suleyman Soyluyî hêna zêde xo dano teber labelê na kerdena peyêne rîyê dewlete yo tersonek vete meydan. Rayşîyayîş heme astengîyan ver resa amacê xo. HDPyî tay bo zî bêvengîya serranê peyênan şikit û hînî dore şar de ya. Şar tersê dewlete dî û gere na saete ra pey bêvengîye ney vengêko berz dewlete bitersno. Bi no qeyde xoverrodayîş beno pîl û reseno amacê xo…

Dikarî Biecibînî