Kurdistanêk esto!

2013… Serekwezîrê Dewleta Tirkî R. Tayyîp Erdoganî, ‘Eke biewnî zebitanê ê wextan ê do çekûya Kurdistanî tede bivînî.’

2019… Serekê Dewleta Tirkî R. Tayyîp Erdoganî, ‘Tirkîye de herêmêka bi nameyê Kurdistanî esta?’

Mîyanê 6 serran de çi bedelya? Çira îdarekarê dewlete vatişanê xo yê verênan xo vîrî ra kenî? Şinasnayîş û înkar çi yê? Gelo înkar qedîyabi, se bi?… Nê persî qet û qet nêqedîyenî û raşta ci cewabê heminan benî kitabêk. Labelê tena vatişê Erdoganî yê 2013 û 2019î bêrê şîrovekerdene, bes ê.

Tîya ra nêzdîyê 100 serre verê cu, demo ke meclîso yewin amebi ronayîş; Kurd û Kurdistan tede bibî û merdim tena estbîyayîşê nê wirdî çekûyan ra eşkayêne vajo ke înkar çin o. Bi qebûlkerdişê qanûno bingeyîn o newe înkar destpê kerd. Çunkî her wirdî çekûyî qanûno bingeyîn de çin bî û înkar bibi esasê dewlete. Kurdî estî, Kurdistanêk esto la şinasnayîşê nê wirdî çiyan vîrê îdarekaran ra şîyo. Kerdena Erdoganî manena kerdena ê wextan. Tu cîyayî nabênê înan de çin a. Labelê merdim eşkeno vajo ke înkar, înkarî ra wet o û Kurdî nika hem yenî şinasnayene hem zî yenî înkarkerdene.

Gelo naye senî wina bena? Raşta ci ecêb o. Labelê kerdenê 100 serran naye mojneno. Zanîstîya komelnasî de vateyêko winasî esto; dûrîvistişo şinasnaye, yanî hem şinasneno hem zî dûrî fîneno. Naye înkarî ra wetêr a. Çunkî înkarî de şinasnayîş çin o û her çi zelal o. Labelê çiyo ke ma bi nê vateyo komelnasî reyde şîrove kenî, înkar nîyo. Netewe-dewlete ronayîşê xo ra dima înkarî ser o heme polîtîkayan viraşt û bin o qeyde kerd ke vengêk, rengêk, alayêk, komelêk, yanî yewperestîyêk bibo. Bingehê yewperestî bi înkarkerdişê cîyayîyan virazîyeno, aye ra merdim eşkeno vajo ke nabênê netewe-dewlete û înkarî de hemsencîyêk esta. Dewleta Tirkî sey netewe-dewletêk naye ser o endêk serre pay ser de menda û hema zî pay ser o ya. Labelê ge-ge mîyanê xo de îstîsnayan viraşt û vera înkarî şinasnayîş zî xo rê kerd esasêk.

Hem şinasnayîş hem înkar, kerdenêka bîne xo reyde peyda kerd û hînî ma eşkenî vajî ke Kurdî înkarê înkarî yê. Çunkî hem ameyî înkarkerdene hem şinasîyayî hem zî newe ra raştê înkarî ameyî. Nê hêrî kerdenî encamêko winasî vejeno orte û aye ra Erdoganî zî birehetî eşkeno vajo Kurdistan esto?

Se beno wa bibo, kamcîn dewlete, kamcîn îdarekar, kamcîn partî, rêxistin, hêz, hetî, vajî ke Kurdistan çin o! Xo xapîneno. Çendêk Kurdan bikerî înkarê înkarî zî Kurdistanêk esto û Kurdî nika seba welatê xo, xo ver danî. Ne vatişê Erdoganî ne zî estbîyayîşê Dewleta Tirkî, nêeşkenî na raştî çin bikerî aye ra ê zî kenî ke Kurdan çin bikerî… Çinkerdiş bi qetlîam û talan beno; seba polîtîkaya qetlîam û talanî zî ma eşkenî tespîtê zanayêko Efrîqayij Achille Mbembeyî yê ‘nekro-polîtîka’ sey nimune bidî. Goreyê Mbembeyî, netewe-dewlete seba ke pay ser de bivindero demo newe de polîtîkayanê xo mergî ser o naya ro. Ma eşkenî nê testîpê Mbembeyî kerdenanê Dewleta Tirkî ser o vajî, Dewleta Tirkî nika seba domnayîşê xo tena mergî esas girewto. Labelê ne nekro-polîtîka ne zî înkarê înkarî nêeşkenî vernîya Kurdan de bivinderî; Kurdistano ke esto do heta hetayê bibo!

Dikarî Biecibînî