Îxtîyacî ney esas o micadele!

Demo modern de her çi îxtîyacîyan ser o awan keno. Heme çiyê ke eîdê merdimî yê îxtîyacîyan ser o virazîyenî. Bi no qeyde merdimayî esasanê xo ra dûrî keweno. Her tim meseleya esasin vîrê merdiman ra şona. Naye zî heme kesan erzena mîyanê tengasîyanê pîlan û merdimî tena bi îxtîyacîyan sînordar kenî. Îxtîyacîyê ke estî her tim sey astengîyêka pîle vernîya merdimayî de benî dore û nêverdenê ke gamêka newe bêra eştene. Helbet merdimayî çiyanê ke aye ra lazim ê xo rê sey îxtîyacîyêk vînena û seba aye kewena mîyanê berardişêk, labelê estbîyayîşê hîsanê merdimayî de îxtîyacîya tu çiyêk çin a û zafê çiyanê ke demo newe de bîyê sey îxtîyacî, esas ê, îxtîyacî nîyê. Aye ra çiyê ke ma nika tede yê û sey esas ma gere bicuyê estî. Înan ra yew zî micadele yo. Micadele îxtîyacî ney esas o. Hela hela micadeleyo ke seba neteweyêk yan zî şarêk yeno dayîş, qet û qet îxtîyacî nîyo. Amacêk esto û esasê xo de amacî nêqedîyenî; aye ra seba amacî micadele esas o.

Roja ma ya ewroyîn de Kurdî her çar perçeyê Kurdistanî de hema zî nêresayî amacanê xo û esasê înan o sereke zî micadele yo. Her çi ra ver gere micadeleyî sey îxtîyacîyêk ney sey esasêk bigîrî xo dest. Çunkî eke çiyêk her tim sey îxtîyacî bêro vînayene, goreyê demî çiyan yeno awankerdene û peynîya ci zî beno. Aye ra çiyo esasin yê sey micadeleyî gere her tim ganî bibê û tu wext goreyê demî nêbê. Verê çimanê dinya de sere de Hemsereka Kongreya Komelê Demokratîk Leyla Guvene û gelek embazê aye grevê vêşanîye de yê û micadeleyo ke seba înan esas o domnenê. Labelê vera micadeleyê înan de bêvengîyêka pîle esta û gamêk seba şiknayîşê na bêvengîye nêna eştene. Çunkî Kurdî her tim seba deman têwgêrayî û micadeleyî sey îxtîyacîyêk dîyê. Aye ra nika a îxtîyacîya demanê verênan goreyê nê prosesî newe nêbenî û seba amacî sey esasêk nênê vînayene.

‘Her yew îxtîyacîya ke şar bi xo awan kerda, sey rêzilêk milê xo de girêdaya.’, vano Jean J. Rousseau, kitabê xo yê bi nameyê Peymanê Komelî de… Îxtîyacî sibarojî de dorê milê ma de girê dîyena û nêverdena ke ma gamêka newe bierzî. Aye ra çiyo muhîm esas o. Esaso nikayîn zî micadele yo. Rayîrê micadeleyî yo yewin zî berzkerdişê vengî yo. Eke ma vera zilmkaran de vengê xo berz nêkerî û wayîrê esasê xo nêvejî, do tu amacî ke ma wazenî biresî, ma do nêeşkî biresî. Her cayê welatî û teberê welatî de çalakîya grevê vêşanîye dewam kena. Rayîro nikayîn ê micadeleyî çalakîya grevê vêşanîye yo. Wayîrvejîyayîşê na çalakîye do zaf çiyan bibedelno. Û do seba heme hetan bibo cerebnayîşêko pîl. Çunkî bi wayîrvejîyayîşê na çalakîye do micadeleyê kategorîya îxtîyacan ra derbasê kategorîya esasan bibo. Eke şarê Kurdî no esas xo rê bikero rayber û bi no qeyde heme çiyan ra bibo cewab, do sere de tecrîd bişikyo û dima ra zî amacê bînî hêdî hêdî biasîyê. Serkewtişo ke her kes û her het bayê ci yo, nêzdî yo. Dişmen her çendêk xo pîl bimojno ra zî estbîyayîşê micadeleyo ke esasê zaf çiyan o, perdeya tersî ya dişmenî bidirno û xo rey de serkewtişî bîyaro… 

Dikarî Biecibînî