Her çi versîya weçînayîşî de yo!

Weçînayîşo ke do tarîxê Tirkîye de cayêko pîl bigîro ravêrt. Weçînayîşê 31ê adare zaf çiyan mojna ma. Hem seba muxalefetî hem zî seba îqtîdarî zaf çiyî bîyî zelale. Na zelalîye bi destê şarî ameye mojnaneye. Labelê do muxalefet û îqtîdar nê çiyan bivînî yan nêvînî merdim raşta ci nêzano. Çiyo esasî no yo ke hetê şaran ra dersêk ame dayene û şarî sindoqan de waştî ke zaf çiyan bibedelnî. Weçînayîş qedîya û nê dersî mendî. Sere de îqtîdar dima zî muxalefet weçînayîşî ser o hema zî nîqaşanê xo domnenî. Bitaybetî îqtîdar keno ke rojeva weçînayîşî qet û qet panêdîyo û heta kamcayî beno wa bibo na rojeve ser o sîyasetê rojane bikero. Na kerdena îqtîdarî seba binkewtiş yan zî serkewtişî nîya. Na kerdene birnayîşê  vengêk a!

Weçînayîşî ser o di hewteyî vîyartî labelê Kurdistan û Tirkîye de hema zî nîqaşê ey dewam kenî û aye ra sere de Kurdî dima ra zî muxalîfê Tirkî nêeşkenî abigêrî rojevanê xo yê esasîyan. Sere de gere merdim seba pêroyîyê Tirkîye naye vajo; krîzêk esto û no krîz her roje hêna beno xorîn. Muxalefet gere no krîz baş analîz bikero û raya pêroyî ra parr bikero. Labelê seba ke îqtîdar rojeva weçînayîşî germ tepişnena krîz qet û qet nêkeweno rojeve. Bi no qeyde îqtîdar çiyê ke wazeno nêro vînayene nîşanê raya pêroyî nêdano û şarê Tirkîye nê xeberan nêeşnawena. Meseleya krîzî bi no qeyde yena nimitene.

Rojeva bîne û ya en esasî zî grevê vêşanîye ya. Zindanan de grevê vêşanîye 120 rojan ravêrt, Hemsereka KCDyî Leyla Guvene çalakîya xo resnena 160 rojan, Ewropa û gelek cayanê bînan de grevê vêşanîye bi eynî îrade û bawerî dewam keno. Kerdenê nikayîn ê îqtîdarî no yo ke grevê vêşanîye raya pêroyî ra binimno û nêverdo ke şar vengê xo bivejo. Aye ra roja ke prosesê weçînayîşî destpê kerd heta nika îqtîdar keno ke çalakîya grevê vêşanîye, binê versîya rojevanê ey de bimana û reaksîyonêk nêvejîyo. Kerdenê îqtîdarî dîyar ê û xura polîtîkaya ke dişmentîye ser o ameya awankerdene nê çiyan esas gêna; labelê  her çendêk îqtîdar biwazo grevê vêşanîye binê versîya weçînayîşî yan zî rojevêka bîne de bimano gere sîyaseto ke wayîrê grevan bivejîyo nêkewo dama îqtîdarî. Nika çiyê ke qewimyenî mojnenê ma ke ma pêro kewtî dama îqtîdarî. Weçînayîşî ser o di hewteyî ravêrtî la ma hema zî rojeva xo ya esasî sey weçînayîş vînenî û verê xo tanêdanî çalakvananê grevê vêşanîye û ma bêvengîya xo nêşiknenî. Tu çalakî bi bêvengî nêresaya amacê xo, aye ra her çi ra ver na versîya ke çalakîya grevê vêşanîye ser de ya bêra wedartene û sere de şarê Kurdî dima zî dostê înan wayîrê grevê vêşanîye bivejîyê. Waştişê çalakvanan waştişê heme şarî yo, wedartişê tecrîdo ke Rayverê Şarê Kurdî Abdullah Ocalanî ser de yo, wedartişê tecrîdo ke pêrûnê Kurdistanî ser de yo. Helbet do na rewşe wina dewam nêkera; nimuneyê çalakîyanê winasîyan û serkewtişê înan zaf ê. Labelê  serkewtiş bi wedartişê versîya ke sereyê çalakîya grevê vêşanîye de esta, mimkûn o. Seba naye zî barêko giran keweno milê sîyasetî.

Dikarî Biecibînî