Tecrîdê xo ser o wedarne!

1999î ra nata Kurdistan û Tirkîye de rojevêka bi nameyê tecrîdî esta û na rojeve qet û qet nêqedîyaya. Dewleta Tirke roja ke Rayverê Şarê Kurdî Abdullah Ocalanî esîr girewt, sey polîtîkaya sereke tecrîd girewt rojeva xo û a roje ra nata polîtîkaya ke Îmralî de esta yena waştene ke pêrûnê Kurdistan û Tirkîye de biba serwere.

Tecrîdê Îmralî dem bi dem ame wedartene û pêvînayîşî virazîyayî. Heta 2011î qet nêbo avukatî şîyênê Îmralî û pêvînayîşan viraştêne. 2011î ra nata yo ke tu avukatî nêşîyê Îmralî û nêeşkayî muwekîlê xo de pêvînayîşî bikî. O wext seba tecrîdo ke newe ra ronîyabi çalakîya grevê vêşanîye dîyabî destpêkerdene û a çalakî 68 rojan dewam kerdibî. Peynîya a çalakîye de tecrîd wedarya û tena wedartişê tecrîdî ney destpêkerdişê prosesêko newe zî kewt rojeva Kurdistan û Tirkîye. Bi wedartişê tecrîdî heme dinya dî ke eke berê Îmralî abibî, berê dîyalog û muzakereyî abenî. Aye ra wedartişê  tecrîdî çiyo en muhîm bi û zindanan de kesê  ke na hemle dabî destpêkerdene na raştîye heme kesan ra başîr zanayêne.

Wexto ke ma bi çimê  2012î biewnî nika ra zaf çiyî bedelyayî. Her çi ra ver sîstemê dewlete, sîstemo verên nîyo; beno ke îdarekar yan zî hikûmet eynî bo labelê hişmendîya nikayîn rengê xo bedelnaya. Aye ra miqayeseyê 2012î mesela tam şîrove nêkena. Prosesê ê wextan û nika qet yew nîyê. Ne nêzdîbîyayîşê dewlete ne zî vindertişê şarî; eynî nîyê. Labelê  çiyo ke eynî mend û hema zî bi xorînbîyayîşî dewam keno tecrîd bi xo yo. Çunkî tecrîd sey estbîyayîşêko gane bi pîl û dorûverê welatî sey vilika mastêrine tepişto.

Tecrîd hînî tena eîdê Îmralî nîyo. Bitaybetî 5ê nîsane 2015î ra dima tecrîd gonîya xo teze kerd û xo kerd mutleq. No mutleqbîyayîş kerd ke heme merdimê ke na erdnîgarîye de cuyenî binê tecrîdî de bî. Aye ra tecrîd tena eîdê Îmralî nîyo, no vatiş bîlasebeb nêno vatiş. Rayverê Şarê Kurdî Abdullah Ocalanî pêvînayîşo peyêne yo ke birayê  xo de kerd de vano, ‘Sere de tecrîdo ke şima ser de yo wedarnêne.’ No vatiş mojneno ma ke tecrîdo ke Rayverê Şarê Kurdî ser de yo eynî wextî de ma hemine ser de yo. Aye ra gere merdim sere de tecrîdo ke xo ser de esto baş şîrove bikero û bişinasno. Dima ra do bieşko wedarno.

Her çi ra ver her Kurdêk mîyanê na babete de ca gêno; her Kurdêk û her cîyayîyêk ser o no tecrîd esto û gere sere de merdim tecrîdo ke xo ser de ronîyayo wedarno. Na mesela de merdim en zêde vindertişê dayîkan vîneno; dayîkê ke nê rojan de raştê  zilmo en pîl yenî, fam kerdî ke tecrîd înan ser de esto û aye ra dest bi çalakîyan kerdî. Aye ra nika en zêde ê raştê hêrişan yenî. Gere her kesêk sey dayîkan meseleya tecrîdî şîrove bikero û tecrîdê xo ser o wedarno!  

Dikarî Biecibînî