Veng bidêne vengê zindanan!

Rewşe her wextan ra  hêna xidar a û bêvengî her roje hêna zêdîyena. Dewlete gaman nêerzena û verê aye de zî tu çiyêk zî nêvana. Rayverê Şarê Kurdî Abdullah Ocalanî de rayêk pêvînayîş virazîya. No pêvînayîş de peyam zaf zelale bi û çalakîya  grevê vêşanîye dewam kena. Hemsereka Kongreya Komelê Demokratîk Leyla Guvene 187 rojî yo ke grev de ya, Hewlêr de Nasir Yagizî çalakîya xo resna 174 rojan, Ewropa de grev 148 rojî yo ke dewam keno û zindanan de 148 rojî yo ke çalakîya grevê vêşanîye dewam kena. Rojeyê mergî zî hetê  di grûban ra domyeno. Grûba yewine 30ê nîsane û grûba diyîne zî 10ê gulane de kewtî grevê vêşanîye. 30 hepsîyê sîyasî nika rojeyê mergî de yê.

Her çendêk avûkatî şîyê Îmrali û Rayverê  Şarê Kurdî Abdullah Ocalanî de pêvînayîş kerdî zî tecrîd weranêdîya û çalakîya grevê vêşanîye zî nêqedîya. Dewlete kerde ke Ocalanî de pêvînayîşêk bêro viraştene û ê pêvînayîşî ra dima do çalakî biqedîya. Labelê  xoverdayoxî û hêna îdarekarî na kerdena dewlete raşt nêdîye û fek çalakî ra veranêdayî.

Çalakîya grevê vêşanîye eşkeno demêko derg zî peyê xo de biverdo labelê rojeyê mergî wina nîyo û dem zaf kilm o. Sere de 15 hepsî dima ra hêna 15 hepsî kewtî rojeyê mergî û wina aseno ke do hûmara kesê ke kewenî rojeyê mergî bizêdîyê. Rojeyê mergî verê cu zî welat de qewimya û îradeyêko pîl vejîya orte. 14ê temûze 1982 de hepsîyê sîyasî yan zî ma eşkenî vajê ke rayveranê demî rojeyê mergî dabî destpêkerdene û çalakîya înan vernîya hemleyêka newe akerdibî. Çalakîya nikayîn zî eynî tewir a labelê wext eynî wext nîyo. Îmkanê nikayînî ê wextan ra zêde yê û gere hepsîyê sîyasîyan ra wayîr bivejîyo. 1980an de îmkanî çin bî û tu kes nêeşkayêne derheqê tu çiyêk de biwerzo lingan ser o la nika wina nîyo. Helbet teda zêdna esta û helbet dewlete hêrişanê pîlan kena la nêna a mana ke merdim peyser game bierzo û cayê xo de ronişo. Çunkî dem her deman ra zêde demê xebate yo.

Ewro micadeleyo ke 40 serran peyê xo de verdayo her wextan ra hêna zêde aver de yo û tena Bakurê Kurdistanî de ney çar perçeyanê Kurdistanî de xoverrodayîşê xo domneno. Aye ra zaf normal o ke her cayan ra hêrişî bêrî kerdene. La tu çiyêk nêeşkeno vernîya micadeleyo ke heqdar o û do bireso amacê xo bigîro. Kurdan zaf bedel da û bi bedelo ke da nika pay ser de yo. Nika zî eynî tewir bedelî yenî dayene. Aye ra wayîrvejîyayîşê bedelan o, meseleya pîle. Heta ke teber de û her cayê welatî de bedelo ke nika yeno dayene ra wayîrvejîyayîşêk nêvirazîyo do tu çiyêk nêreso amacê  xo û xoverrodayîş veng şêro. Labelê  her  kes baş zano ke şarê Kurdî her wext micadeleyê xo ra  wayîr vejîyayo û resnayo amacê xo. Nika hêna do veng bido vengê zindanan û heme çalakgeran, bikewo kuçeyan û vengê  xo berz bikero. Tena dayîkî ney heme perçeyê  komelî do biwerzî lingan ser o û vengê xo berz bikerî.

Dikarî Biecibînî